«Egemen Qazaqstan» men «Kazahstanskaıa pravda» gazetteriniń birigýi otandyq BAQ ómirindegi mańyzdy oqıǵa boldy. Bul týraly Qazaqstan Respýblıkasynyń Aqparat jáne áleýmettik damý mınıstri Aıda Balaeva aıtty, dep habarlaıdy Egemen.kz.
«Otandyq BAQ ómirindegi mańyzdy oqıǵa eldegi eń iri basylymdardyń – «Egemen Qazaqstan» men «Kazahstanskaıa pravda»-nyń birigýi boldy. Osy jyldyń sońyna deıin «Egemen Qazaqstan» RG» AQ men «Qazaq gazetteri» JShS biriktirilip, «Qazaq gazetteri» biryńǵaı brendimen jumys isteıtin bolady», dedi Aıda Balaeva esep berý kezdesýinde.
Mınıstr atap ótkendeı, bul sharalar memlekettik basylymdarǵa birlesken jańa jobalardy júzege asyrýǵa múmkindik beredi.
«Aǵymdaǵy jyldyń taǵy bir mańyzdy oqıǵasy – eń kóne buqaralyq aqparat quraldarynyń biri Qazaq radıosynyń júz jyldyq mereıtoıy. Búginde onyń baǵdarlamalary búkil elde tyńdalady, radıohabarlarmen qamtý el aýmaǵynyń 90%-yn quraıdy. Jaqyn arada elimizdiń jetekshi joǵary oqý oryndarynda qazaq radıosynyń aýdıtorııasyn ashý jáne Orynbor qalasynda memorıaldyq taqta ornatý josparlanyp otyr», dedi Aıda Balaeva.