Aleksandr Lýkashenko Roman Protasevıch otyrǵan Ryanair ushaǵymen bolǵan oqıǵany tergeý shyǵyndaryn Batys óteýi tıis dep málimdedi, dep habarlaıdy Egemen.kz.
«Taǵy bir sanksııalardy daıyndap jatsańyzdar, oqıǵany tergeý kezinde Belarýs jumsaǵan shyǵyndardy óteýdi umytpańyzdar. Meniń komandam boıynsha TJM, Densaýlyq saqtaý mınıstrligi, saperler, kınologtar, antıterror jáne basqa da qyzmetter kóterildi. Olar halyqaralyq erejeler men bizdiń zańdarymyzǵa sáıkes tartyldy. Bul úshin aqy tóleý kerek», dedi ol Parlament pen Konstıtýsııalyq komıssııa múshelerimen jáne Belarýstiń memlekettik basqarý organdarynyń ókilderimen ótken kezdesýde.
Lýkashenkonyń aıtýynsha, «Belarýske qarsy kóp deńgeıli, kóp qyrly gıbrıd soǵys bastalǵany búkil álemge túsinikti».
«Maqsat aıqyn. Belarýsti qorlaý kimge paıdaly ekenin biz de bilemiz. Sizderge qulaqqaǵys: Belarýs - shaǵyn memleket, biraq biz adekvat túrde jaýap beremiz. Álemde uqsas mysaldar bar. Jete oılastyrylmaǵan, ótkir sheshimder jasamas buryn, Belarýs Eýropanyń ortalyǵy ekenin umytpańyzdar. Munda bir nárse bastalsa, taǵy bir soǵys, dúnıejúzilik soǵys bolady. Aıtpaqshy, aldyńǵysy da osy jerden bastaldy», dedi ol.