Búgin Nur-Sultanda «Baqytty Shańyraq» qoǵamdyq qory qala ákimdiginiń qoldaýymen erekshe qajettilikteri bar balalardy tárbıelep otyrǵan otbasylarǵa psıhologııalyq kómek kórsetý ortalyǵyn ashty, dep habarlaıdy Egemen.kz.
Psıhologııalyq kómek ortalyǵynda erekshe balalardy tárbıelep otyrǵan analar jumys isteıdi. Olar kásiptik oqytýdan ótip, erekshe balalardy tárbıelep otyrǵan otbasylarǵa kómek kórsetedi.
Aıta keteıik, «Baqytty shańyraq» qoǵamdyq qory osymen tórtinshi ortalyǵyn ashyp otyr.
«Bizdiń qorǵa turaqty qoldaý kórsetip, óz jobalarymyzdy júzege asyrýǵa múmkindik bergeni úshin qala ákimdigine alǵys bildiremiz. Ákimdik ylǵı da qol ushyn berýge daıyn turady. Bul ómirde múmkin emes eshteńe joq, eger adam birnárseni ózgertkisi kelse, eńbek etýi kerek. Birge jumys isteıtin áıelderdiń eńbegin kórip otyrmyn. Osyǵan deıin ashqan ortalyǵymyz sekildi munda da erekshe balalardyń analary jumys isteıdi. Olar óz otbasymen – ata-ájelerimen, ákelerimen, deni saý balalarymen jumys isteıtin bolady. Qazir qatarymyzda 15 ana bar. Sondaı-aq anımatorlar qyzmetin ashtyq, al oǵan deıin analarymyzdy arnaıy oqyttyq», deıdi «Baqytty Shańyraq» QQ tóraıymy Botagóz Sultanova.
Esterińizge sala keteıik, ótken jyldan beri elordada ákimdiktiń qoldaýymen túrli toptardyń bastamasymen ashylǵan 8 ortalyq jumys isteıdi. Olar halyqtyń áleýmettik osal toptaryna kómek kórsetedi. Olardyń qatarynda «Strong Mothers» bilim berý ortalyǵy, «Altyn Shańyraq Uıasy» kıim tigý sehy, «Baqytty Shańyraq» qyzmet kórsetý boıynsha kópsalaly ortalyǵy bar.