Qostanaı oblysynda tuńǵysh ret meımandarǵa tek qazaqtyń ulttyq taǵam túrlerin ǵana usynatyn jazdyq etnodámhana jumys isteı bastady, dep habarlaıdy Egemen.kz.
Rýdnyıdaǵy «Qyz Jibek» etnokafesine bas suǵa qalsańyz, dámhana dastarqanynan molynan asylǵan et pen qýyrdaqqa toıyp, súzbe aralastyrǵan ystyq sorpamen as tarqatyp, baýyrsaq, qurt, irimshik, qymyz, shubat sııaqty tańsyq as-sýsynnan qalaýyńyzsha iship-jep shyǵasyz.
Etnodámhanany Rýdnyıdyń mańyndaǵy Iýbıleınyı aýylynda oısyl qara tólin ósirip otyrǵan Nurmahanovtar otbasy ashty. Otaǵasy Almat osydan 5 jyl buryn memlekettiń kásipkerlikti qoldaýǵa arnalǵan baǵdarlamasyn tıimdi paıdalanyp, túıe fermasyn ashqan. Endi, mine, bıyl kún jylynysymen qalanyń bir shetinen aq shańqan kıiz úı tigip, dámhanasyn iske qosty.
Sarybaı-Sokolov ken óndirisinde 15 jyl jumys istegen Almat Nurmahanov 2016 jyly oblystyq kásipkerler palatasynyń janynan ashylǵan «Bastaý Bıznes» kýrsyn támamdaǵan soń, jeńildetilgen nesıe alyp, 5 túıe satyp aldy. О́ńirde kenjelep qalǵan ata kásipti myqtap qolǵa alǵan Almat eki jyl ótken soń, «Atameken-Qostanaı» qarjy ortalyǵynan jeńildikpen taǵy 5 mln teńge nesıe alyp, et pen túıe júnin sata bastady. Osylaısha túıe sanyn otyzǵa deıin jetkizdi. Kásipker munymen toqtap qalmaı, sońǵy bir-eki jyl ishinde týrızm baǵytyn damytýdy qolǵa alyp otyr. Ádette, alty aılyq qysynyń qytymyr minezinen be, áıteýir Tobyl óńirinde kópshilik jurt túıe ustaı qoımaıdy. Sondyqtan oısyl qara tuqymyn bul óńirdiń turǵyndary tańsyq kóredi. Muny jaqsy biletin Almat óziniń túıe fermasyna ekskýrsııalar uıymdastyryp, balalardy túıege mingizip, fotosýretke túsirip, qyzyqtap kelýshilerdi túıe baǵýdyń qyr-syrymen tanystyra bastady.
«Túıe janýaryna degen eldiń erekshe yqylasyn baıqaǵan soń, úıdegi jubaıymyz ekeýimiz kıiz úı tigip, ishin sán-saltanatqa toltyryp, kelgen adamdy ulttyq taǵammen ǵana tamaqtandyratyn dámhana ashsaq qalaı bolady degen oıǵa keldik. Onyń ústine, bizdiń óńirinde dál mundaı dámhanany eshbir jerden taba almaısyz. Bıyl osy oıymyzdy iske asyrdyq. Kıiz úı ózimizdiki, baıaǵyda О́zbekstannan kóship kelgende, ózimizben birge alyp kelgenbiz. Odan keıin satyp jiberip edik, óz úıimizdi ózimiz qaıta satyp alyp, qýanyp jatyrmyz. Kafeniń ataýyn jubaıym «Qyz Jibek» dep qoıdy. Taǵamdy negizinen ózi daıyndaıdy, janynda bir-eki kómekshisi bar», dedi Almat Nurmahanov.
Kásipkerdiń aıtýynsha, qazir ýaqyt qatań talap qoıyp otyr. Sondyqtan etnokafe birden «Ashyq» jobasyna tirkelipti.
«Qazir bılik pen halyq, odan keıin kásipkerler bar, osylardyń árqaısy ár jaqqa bura tartpaı, indetke qarsy birlese kúres júrgizgende ǵana bul náýbetti jeńe alamyz. Qalypty ómirge kimniń tezirek oralǵysy kelmeıdi? Biz áli talaı dúnıelerdi júzege asyramyz ba dep josparlap otyrmyz. Qazir mal basy kóbeıip, jer tarshylyǵyn sezine bastadyq. Fermaǵa qyzyq kórip kelgen meımandarǵa sharýashylyqty aralatyp, kórsetýdiń ózi qolaısyz. Aldaǵy ýaqytta munda qonaqtar túıege minip, kıiz úıge jatyp tynyǵatyndaı týrıstik ortalyq ashamyz ba degen josparymyz bar», dedi kásipker.