30 jyl boıy pasportsyz ómir súrip, zeınetaqy da ala almaı, ómirden basqa da kóp qaǵajý kórgen Soltústik Qazaqstan oblysy Aqqaıyń aýdanynyń týmasy, 62 jastaǵy Raısa Nasıbýllaqyzyna soltústikqazaqstandyq polısııanyń kóshi-qon qyzmeti jaqynda Qazaqstan azamatynyń jeke kýáligin tapsyrdy.
Osy jyldarda ol Moldova Respýblıkasynda turyp kelgen. Pıven degen azamatqa Qazaqstanda kúıeýge shyqqan ol Moldovaǵa 1991 jyly kelgen. Alaıda Moldova Respýblıkasynyń azamattyǵyn ala almaǵan, óıtkeni ol Qazaqstan azamaty bolyp eseptelgen. Al kelmeske ketken Keńes Odaǵynyń qyzyl pasportymen týǵan jerine qaıtyp jete almaǵan. Solaı aı artynan aı, jyl artynan jyl jyljyp, ýaqyt óte bergen. Al bilimi tómen, naqty kásibi joq, buryn saýynshy bolyp istegen áıel buǵan asa qaıǵyra qoımaǵan.
Tek zeınetaqy alýdyń qamymen 2020 jylǵy qarasha aıynda ol Moldova ókimetine júginip, ózin azamattyǵy joq adam dep tanýdy ótingen. Alaıda Moldovanyń zańy boıynsha onyń ótinishi oryndalmaǵan. Aqyrynda ony jergilikti polısııa týǵan jeri – Qazaqstanǵa deportasııalaǵan. Bizdiń polısııa uzaq ýaqyt tekserip, Raısa Pıvenniń eshqandaı qylmystyq áreketterge qatysy joqtyǵyn anyqtaǵannan keıin 1974 jyly berilgen qyzyl pasportty joıyp, Qazaqstan azamatynyń jeke kýáligin tapsyrdy. Qazir áıeldiń qýanyshynda shek joq. Onyń týǵan jerinde týǵan sińlisi turady eken. Ázirge sonyń úıine qonystanǵan.
Aqyl-esi bútin bolsa da pasportsyz júre bergen osyndaı adamdar da bolady eken qoǵamda. Raısa Pıven táýelsiz Qazaqstanǵa eshqandaı eńbek sińirmese de, 1991 jylǵa deıin osynda turǵany eskerilip, TMD-ǵa múshe elderdiń ózara kelisimi boıynsha oǵan kelesi aıdan bastap zeınetaqy taǵaıyndalǵan. Bir kezde qazaqstandyq bolǵan azamatqa osyndaı qamqorlyq jasalyp otyr.
Soltústik Qazaqstan oblysy