Túrkistan oblysynda joǵalyp ketken týrısterdi izdeýge tikushaq jumyldyryldy. Bul jaıynda Túrkistan oblystyq tótenshe jaǵdaılar departamenti bastyǵynyń orynbasary, podpolkovnık Erik Sarybaev málim etti, dep habarlaıdy Egemen.kz.
«Qazirgi ýaqytta Túrkistan oblysynyń Tóle bı aýdanydaǵy Saıram-О́gem memlekettik ulttyq tabıǵı parkinde izdeý jumystary júrgizilip jatyr. 21 mamyr kúni saǵat 08-00 shamasynda quramynda 7 adam bar bir top taýǵa týrıstik joryqqa shyqqan. Olardyń 5 asýǵa barmaq bolǵany týraly aqparat bar. Úsh kúnnen beri júrgizilip jatqan izdeý jumystary nátıje bermeı otyr», dedi ol.
Onyń aıtýynsha, izdestirý jumysyna tótenshe jaǵdaılar departamentiniń mamandary, jergilikti atqarýshy organdardyń, ulttyq parktiń jáne shekara qyzmetiniń qyzmetkerleri, jalpy 50 adam jumyldyrylǵan. Keshe olar taý asýlarynda 37 shaqyrymnan astam jerdi jaıaý júrý arqyly sholyp shyqty. Sonymen qatar kvadrokopterlerdiń kómegimen radıýsy 4 shaqyrymnan asatyn aýmaq zertteldi.
«Osy ýaqytqa deıin tabıǵattyń qolaısyz bolýyna, ıaǵnı, taýly aýdandarda qar, jańbyr jaýýyna baılanysty tikushaq arqyly izdeý múmkin bolmady. Qazirgi ýaqytta Shymkent qalasynyń áýejaıynda turǵan Evrokopter tikushaǵy áýege kóterilip, izdeý jumystary júrgizýde. Qosymsha taǵy tikushaqtardy jumyldyrý máselesi sheshilip jatyr», dedi Erik Sarybaev.