Sońǵy bir aptada elimizde 12 adam sýǵa ketken, onyń ekeýi bala. Bul týraly onlaın brıfıngte TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov málimdedi, dep habarlaıdy Egemen.kz.
Vedomstvonyń málimetinshe, qazirgi tańda elimizde shomylýǵa ruqsat berilgen 469 oryn bolsa, onyń úsh júzge jýyǵy jekemenshik jaǵajaılar. Jalpy Qazaqstanda 50 myńnan astam sý aıdyny bar. Onyń 125 bóliginde qutqarý bólimsheleri jumys isteıdi. Shomylý maýsymy aldynda elimizde 48 jyljymaly qutqarý beketi qoıylady. Sý mańyndaǵy demalys oryndarynda arnaıy daıyndyqtan ótken 108 nysandy qutqarý beketi qurylady. Shomylý maýsymyna daıyndyqty pysyqtaǵan qutqarýshylar qazaqstandyqtardy sýǵa túskende saqtyq sharalaryn umytpaýǵa shaqyrdy. «Búgingi tańda 53 adam, onyń ishinde 26 bala sýǵa batyp qaıtys bolýy tirkelip otyr. Jyl basynan sý aıdyndarynda barlyǵy 38 adam, onyń ishinde 4 bala qutqaryldy. Sýda qaza tabýdyń basty sebebi jabdyqtalmaǵan, tyıym salynǵan jerde shomylý», deıdi TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov.