О́zge óńirler sekildi Atyraýda da 26 sáýirde Ashyq jobasy iske qosyldy. Oblystyq bas sanıtar dárigeriniń orynbasary Gúlnaz Erbatyrovanyń aıtýynsha, qazir 225 kásipkerlik nysannyń ıesi atalǵan jobaǵa qosylýǵa nıet bildirip otyr. Al 184 nysan QR-kodpen jumys isteýdi bastady. Onyń ishinde 34 nysanda synaq rejiminde qoldanylýda.
Degenmen «qyzyl aımaqtaǵy» óńirde áli de koronavırýs ınfeksııasyn juqtyrýshylar qatary tolastamaı tur. Máselen, oblystyq densaýlyq saqtaý basqarmasy baspasóz qyzmetiniń málimetine súıensek, 26 mamyrda 75 adamnan qaýipti vırýstyń belgisi tabyldy. Naýqastardyń arasynda Atyraý qalasynan 51 adam bolsa, Teńiz kenishindegi merdiger mekemelerdiń 6 jumysshysy da bar. Sondaı-aq Jylyoı aýdanynda 10 turǵyn koronavırýs ınfeksııasyn juqtyrypty. Qurmanǵazy aýdanynda – 4, Inderde – 1, Isataıda 3 adam atalǵan dertke shaldyǵyp otyr.
«Qazir úı jaǵdaıynda 535 naýqas emdelip jatyr. Al modýldik aýrýhanada – 153, №2 oblystyq aýrýhanada – 128, ftızıopýlmonologııa ortalyǵynda – 44, aýdandardaǵy stasıonarlarda 127 pasıent hattamaǵa sáıkes em alýda. Sondaı-aq Teńiz ken ornyndaǵy ınfeksııalyq stasıonarda 58 naýqas em qabyldaý úshin oqshaýlandy», dep habarlady basqarmanyń baspasóz qyzmeti.
Infeksııalyq stasıonarǵa júkti áıelder de túsip jatyr. Sonyń biri bes balaly ana Nurgúl Ońǵarbaeva ınfeksııalyq stasıonarǵa júktiliktiń 35-aptasynda túsken.
– Alǵashqyda aǵzamda álsireý baıqalyp, denem qatty qaltyrady. Úreıge boı aldyrmaý úshin mobıldi topty úıge shaqyryp, koronavırýs ınfeksııasyna qarsy PTR-synamasyn tapsyrdym. Úsh kún úıde ambýlatorlyq em qabyldadym. Tórtinshi kúni dene qyzýy 38 gradýsqa deıin kóterildi. Sodan keıin jedel járdem brıgadasyn shaqyrýǵa týra keldi, – deıdi N.Ońǵarbaeva.
Ol №2 oblystyq aýrýhanadaǵy ınfeksııalyq stasıonardyń bosandyrý zalynda altynshy perzentin ómirge ákeldi. Dárigerler ana men sábıdi aman saqtap qalý úshin kesar tiligi arqyly ota jasaǵan.
– Buryn qaýipti vırýstyń baryna senbeýshi edim. Aýrýhanaǵa jatqan soń bastapqyda ottegi konsentratoryn paıdalanǵym kelmedi. Biraq jansaqtaý bólimine túskennen keıin onyń qajettigine kóndiktim. Munda dárigerler men medbıkeler táýlik boıy naýqastardyń ómirine arasha bolyp júrgenin kórdim. Biraýyz jyly sózimen de, hattamada kórsetilgen emimen de naýqastarǵa meıirimin tókken aq halatty jandardyń qurmetine qyzymyzdyń esimin Meıirim atadyq, – deıdi N.Ońǵarbaeva.
Basqarmanyń baspasóz qyzmeti usynǵan aqparatqa qaraǵanda, ınfeksııalyq stasıonarda jyl basynan beri 51 sábı dúnıege kelipti. Qazir bul stasıonarda bosanǵan 8 áıel emdelip jatyr. Al 43 ana sábıimen birge úıine shyǵarylǵan. Sábılerdiń eshqaısysynan koronavırýs ınfeksııasy anyqtalǵan joq.
Árıne, tajaldy toqtatýdyń basty tásili – vaksına saldyrý. Osyǵan baılanysty derekti tarqatar bolsaq, 26 mamyrda Spýtnık V, QazVac jáne Hayat-Vax vaksınalarynyń birinshi komponentin jergilikti 849 turǵyn saldyrypty. Al 1 aqpan men 26 mamyr aralyǵynda vaksına saldyrǵandar sany 52 354 adamǵa jetip otyr. Vaksınalardyń ekinshi komponentin 21 144 adam alǵan.
Biraq muny dárigerler turǵyndar belsendiliginiń tómendigimen baılanystyryp otyr. Sol sebepten vaksına saldyrýdyń mańyzyn túsindiretin mobıldi top quryldy. Onyń quramynda oblystyq densaýlyq saqtaý basqarmasynyń basshysy Ashan Baıdýálıev, óńirdiń bas memlekettik sanıtar dárigeri Mádenıet Tanaýov, sondaı-aq oblystyq Bilim basqarmasynyń basshysy Sátqan Esenǵalıev bar. Bul top músheleri aldymen S.Muqashev atyndaǵy kolledjdiń ujymymen kezdesý ótkizdi.
– Atyraý oblysyna 1 aqpan men 26 mamyr aralyǵynda 74 200 doza vaksına jetkizildi. Aqparattyq-túsindirý jumystarynyń nátıjesinde vaksına dozalarynyń teń jartysy ıgerildi. Turǵyndar arasynda vaksına saldyrýdyń mańyzyn túsindirý qajet. О́ıtkeni turǵyndar vaksınalaý týraly barlyq aqparatty tıisti basqarmalar bsshylarynyń ózinen estigisi keledi, – deıdi oblystyq densaýlyq saqtaý basqarmasynyń basshysy A.Baıdýálıev.