Almatyda koronavırýstyq ınfeksııa juqtyrǵan naýqastardy emdeýge arnalǵan klınıkalar birtindep qalypty jumys rejımine kóshirile bastaıdy. Bul týraly onlaın-brıfıng barysynda qalalyq Qoǵamdyq densaýlyq departamentiniń basshysy Narıman Tabynbaev osyndaı aqparatpen bólisti, dep habarlaıdy Egemen.kz.
«Vırýs juqtyrǵandar sanymen aýrýhanaǵa jatqyzý kórsetkishiniń tómendeýine baılanysty densaýlyq saqtaý basqarmasy arnaıy beıimdelgen klınıkalardy ishinara bosatý qajet degen toqtamǵa keldi. Osy aptada jedel medısınalyq kómek aýrýhanasyn qalypty jumysyna birtindep kóshirý týraly buıryq shyǵardyq. 1 maýsymnan bastap onda naýqastar jatqyzylmaıdy», dedi basqarma basshysy.
Infeksııalyq baǵytta emes, qalypty rejımge qaıta kóshiriletin medısınalyq uıymdar tiziminde birinshi perzenthana men Qorǵanys mınıstrligi aýrýhanasy, «Halyq Arena» sporttyq kesheninde qurylǵan gospıtal jáne temirjol emhanasy mekemeler bar. Osylaısha, qalalyq klınıkalar birtindep ádettegi jumys tártibine kóshedi.
«Birinshi qalalyq klınıkalyq aýrýhana da osy tizimge engizilýi múmkin. Eger aýrýhanaǵa jatqyzý úrdisiniń tómendeýi baıqalsa, qalalyq kardıologııalyq ortalyqty da bosatamyz», dep túsindirdi Narıman Tabynbaev.
Onyń aıtýynsha, eger koronavırýstyq indetke shaldyqqan naýqastar sany tómendeı berse, eki-úsh aı ishinde shahar bıligi taǵy birneshe juqpaly aýrýlar aýrýhanalaryn jumys baǵytyna sáıkes burynǵy jumys rejımine aýystyrady.
Aıta ketetini, búgingi kúni Almatydaǵy aýrýhanalarda 2095 naýqas jatyr, onyń 64-i balalar. Jan saqtaý bóliminde 246 tósek bar, onyń 33%-ynda almatylyqtar em qabyldaýda. Oryndardyń tolý deńgeıi 31,4%-dy quraıdy. Eske sala ketsek, bul kórsetkish eki aı buryn 75%-ǵa jetken.
«Vaksınasııa naýqanyna úlken úmit artamyz. Josparlanǵan kontıngenttiń shamamen 35%-y ekpe alǵanyna qýanyshtymyz. Almaty 327 myń doza jetkizildi, onyń 297 myń 300-in qoldanamyz. Qoımada vaksınalar jetkilikti: QazVac, Hayat-Vax jáne Spýtnık V preparattary bar. Ekinshi komponentti 182 032 adam salǵyzdy. Vaksınasııanyń deńgeıi jaman emes. Jýrnalıster «asqynýlar men reaksııalardyń esebin júrgizesizder me» degen suraqtardy jıi qoıady. Árıne júrgizemiz», dedi Narıman Tabynbaev. Buǵan qosa oblystyq densaýlyq saqtaý basqarmasy deńgeıinde sanıtarlyq-epıdemıologııalyq baqylaý bólimimen birge vaksına nemese basqa dárilerge qatysty reaksııalarǵa jaýapty toptar quryldy.
«Bul naýqan tolyǵymen baqylaýda», dep sendirdi basqarma basshysy.
Alaıda Narıman Tabynbaev baıandaǵan ózgeristerge qaramastan, Almatyda epıdemıologııalyq ahýal áli de kúrdeli. Qalanyń bas memlekettik sanıtar dárigeri Jandarbek Bekshınniń aıtýynsha tipti mýtasııalanǵan shtamdardy tirkeý kórsetkishi 84%-ǵa jetken, qala «qyzyl» aımaqta.
«Biraq mamyr aıynyń sońǵy aptasynda epıdemıologııalyq ahýal turaqtaldy, sáýirdegi 700 jaǵdaıdan ótken táýlikte 290-300 jaǵdaıǵa deıin tómendedi. Táýliktik ósim 3 esege tómendedi, aıdyń basyndaǵy 1,2% -dan 0,4% -ǵa deıin, al syrqattaný deńgeıi sońǵy 7 kúnde 7,7% -ǵa, 160,0-den 147-ge tómendedi. Sımptomatıkalyq naýqastardyń kóbeıýi mamyr aıynyń ortasynda baıaýlady, aıdyń aıaǵynda 10% -ǵa, 98%-dan 88%-ǵa deıin azaıdy. Sonymen qatar, sımptomsyz naýqastar sany 12% deıin ósti», dedi Jandarbek Bekshın.
Onyń aıtýynsha, úshinshi tolqyn kezindegi kórsetkishterdiń tómendeýi qabyldanǵan shekteý sharalary men megapolıs turǵyndarynda qalyptasa bastaǵan qoǵamdyq ımmýnıtetke baılanysty.