О́zbekstan astanasy Tashkentte ótip jatqan aýyr atletıkadan jasóspirimder arasyndaǵy álem chempıonatynyń kezekti kúninde el qorjyny eki júldemen tolyqty.
Jasóspirimder arasyndaǵy jahandyq dodada 67 kılo salmaqta synǵa túsken otandasymyz Aqmolda Saıramkez álem birinshiliginiń kúmis júldesine ıe boldy. Qossaıys nátıjesi boıynsha ol 308 (132+176) kılony baǵyndyrdy. Atalǵan salmaqta Túrkııa sportshysy О́zbek Fýrkan 317 kılo ziltemirdi eńserip, álem chempıony atansa, otandasy Gench Iýsýf 301 kılomen úzdik úshtikti qorytyndylady.
Sondaı-aq qyzdar arasynda baq synaǵan Gúlnur Ybyraı qola júldeni jeńip aldy. 64 kıloǵa deıingi salmaqta óner kórsetken qandasymyz eki baǵdarlamada 205 (90+115) kılony kóterdi. Aıta keteıik, Tashkenttegi tartystyń alǵashqy kúninde Abylaı Áýelhanov (55 kg) chempıon atanǵan bolatyn.