Qazaqstanda kelesi aptada birneshe mańyzdy kún atap ótiledi. Naqtyraq aıtqanda, 31 mamyr elimizde saıası qýǵyn-súrgin jáne asharshylyq qurbandaryn eske alý kúni retinde belgilengen, 1 maýsym halyqaralyq balalardy qorǵaý kúni, al 4 maýsym – QR Memlekettik rámizder kúni. Elordada osy is-sharalardyń qurmetine oraı is-sharalar, kórmeler, konsertter ótedi. Bul jıyndardyń kópshiligi onlaın formatta uıymdastyrylady, dep habarlaıdy Egemen.kz elorda ákimdiginiń resmı saıtyna silteme jasap.
Saıası qýǵyn-súrgin jáne asharshylyq qurbandaryn eske alý kúni «ALJIR» murajaı-memorıaldyq kesheni Sankt-Peterbýrg, Ierýsalım, Tel-Avıv, Tbılısı, Almaty qalalary boıynsha zertteý ekspedısııalary barysynda jınalǵan materıaldar negizinde «Aljırdiń biregeı eksponattary» atty onlaın-kórmesin ótkizedi. Sol kúni mýzeıdiń áleýmettik jelilerdegi paraqshasynda saıası qýǵyn-súrgin jáne totalıtarızm qurbandaryn eske alý memorıalyna jáne «1932-1933 jyldardaǵy asharshylyq qurbandaryna taǵzym» monýmentine gúl shoqtaryn qoıý rásimin kórýge bolady. Birneshe saǵattan keıin murajaı ǵımaratynda Eýropalyq Keńes pen «ALJIR» murajaıy uıymdastyrǵan «Totalıtarızm qurbandaryn eske alý – Eýroodaq pen Qazaqstan arasynda jańa kópir salý» taqyrybynda dóńgelek ústel ótedi.
Halyqaralyq balalardy qorǵaý kúnine oraı «ALJIR» «Karlag týraly aqıqat» onlaın-kórmesin uıymdastyrady. Sondaı-aq, 1-3 maýsym aralyǵynda «Karlag balalary» týraly dáris ótkizedi. 4 maýsymda Qazaqstan Respýblıkasynyń Memlekettik rámizder kúnine oraı murajaıda «Birlik pen beıbitshilik nyshandary» vırtýaldy kórmesi, al 4 jáne 5 maýsymda «Memlekettik rámizder – elimizdiń nyshany» dárisi ótedi.
Balalardy qorǵaý kúnine oraı, 1 maýsym kúni saǵat 15:00-de «Naz» memlekettik bı teatry «Baqytty bolsyn balalar» konserttik baǵdarlamasyn ótkizedi.
Nur-Sultan ákimdiginiń ortalyqtandyrylǵan kitaphanalar júıesi de ataýly kúnderden tys qalǵan joq. Máselen, 31 mamyrda Mıchýrıno turǵyn alabyndaǵy №10 buqaralyq kitaphanada, sondaı-aq №2 balalar kitaphanasynda Saıası qýǵyn-súrgin jáne asharshylyq qurbandaryn eske alyp, slaıdtar men kórme stendteri barysynda ótken ǵasyrdyń zobalań jyldary bolǵan oqıǵalar týraly aıtylady.
1 maýsymda qalalyq kitaphanalarda balalarǵa arnalǵan oıyn baǵdarlamalaryn, saıystar, vıktorınalar, erteńgilikter ótkizý josparlanyp otyr.
1 maýsym kúni saǵat 19:00-de Nur-Sultan qalasynyń memlekettik akademııalyq fılarmonııasy Ǵ.Jubanova «Pod znakom Bely Bartoka» atty ishekti aspaptar kvartetiniń konsertine shaqyrady.
4 maýsymda fılarmonııa QR Memlekettik rámizder kúnine arnalǵan «Jelbiregen kók týym» klassıkalyq jáne estradalyq vokal bóliminiń konsertin uıymdastyrady.
5 maýsym kúni tańerteń «Astana» konsert zalynyń sahnasynda Qazaqstan Respýblıkasy Táýelsizdiginiń 30 jyldyǵyna arnalǵan «JANA TOLKYN» balalar men jasóspirimder shyǵarmashylyǵynyń I respýblıkalyq baıqaýy ótedi.
1 maýsym kúni saǵat 11:00-de Astanalyq sırk Instagram-daǵy resmı akkaýntynda (Astanalyqtsirk) sırk ártisteriniń ónerin onlaın usynady. Al eki saǵattan keıin sırk «Detı solnsa» sharasyn tikeleı efırde ótkizedi.
Aıta ketý kerek, is-sharalardyń bári sanıtarlyq normalardy saqtaı otyryp ótkiziledi.