Batys Qazaqstan oblysy Aqjaıyq aýdanyna qarasty Atameken aýylynyń turǵyny jer qazyp jatyp, Azamat soǵysy jyldaryndaǵy snarıad taýyp aldy, dep habarlaıdy Egemen.kz.
Oqys oqıǵa týraly qońyraý Tótenshe jaǵdaılar departamentiniń kezekshi bólimine mamyr aıynyń 31-i kúni túnde túsken. 1967 jyly týǵan Saǵyndyq esimdi azamat óz aýlasynan shuńqyr qazyp júrip, uzyndyǵy 350 mm, dıametri 90 mm ábden tot basqan snarıad taýyp alǵan. Qazir oqıǵa ornyn aýdandyq polısııa qyzmetkerleri qorshap, qaýipti zatty zalalsyzdandyrý úshin saperlerdi kútýde eken.
– Sýretine qaraǵanda, bul – 76 mılımetrlik shrapnel snarıad bolsa kerek. Mundaı snarıadtar Azamat soǵysy kezinde qoldanylǵan. Oqtumsyqtyń basyndaǵy tetikke 4-7 sekýnd aralyǵyndaǵy ýaqyt qoıylady, snarıad zeńbirek oqpanynan ushyp shyqqan soń qoıylǵan ýaqyt ishinde jaý shebine jetip, aýada jarylǵan kezde ishindegi 80-nen 120-ǵa deıingi bolat shar jaıaý áskerdiń basyn talqandap ketedi, – deıdi Kókterek mýzeıiniń jetekshisi, qarý-jaraq bilgiri Jaısań Seıitkereev.
Aqjaıyq aýdanyndaǵy Atameken aýyly, burynǵy Antonov bekinisi shynynda da Azamat soǵysy jyldary qym-qýyt soǵystyń oshaǵy bolǵan eldi meken. Munda HH ǵasyrdyń basyndaǵy kezeńge qatysty tarıhı jádigerler jıi tabylyp jatady.