Almatyda Ile-Alataý ulttyq parkiniń vızıt-ortalyǵynda «Qazaqstannyń tumsa tabıǵaty» birinshi respýblıkalyq fotobaıqaýy qorytyndylanyp, jeńimpazdardyń esimi jarııalandy. Táýelsizdiktiń 30 jyldyǵyna arnalǵan baıqaýdy Ekologııa, geologııa jáne tabıǵı resýrstar mınıstrligi National Geographic Qazaqstan jýrnalynyń redaksııasymen birlese uıymdastyrǵan bolatyn.
Dodanyń basty maqsaty – adam men tabıǵattyń ózara árekettesý máselelerine qoǵam nazaryn aýdarý, tabıǵı alýantúrlilikti saqtaý jáne qorshaǵan ortaǵa degen qurmet ıdeıasyn keńinen nasıhattaý. Uıymdastyrýshylar janýarlarǵa jasalatyn qatygezdiktiń aldyn alý men janashyrlyq sezimin oıatý, ósimdikter álemine uqypty qaraý ıdeıalaryn óner týyndylary arqyly keńinen dáripteý qajet dep esepteıdi.
«Baıqaýǵa arnalǵan saıtta 782 adam tirkelip, 1515 sýret saıysqa tústi. Sýretterdiń basym kópshiligi kompozısııalyq turǵydan ádemi bolǵandyqtan qazylar alqasynyń aldynda úlken jaýapkershilik pen qıyn tańdaý turdy. Jalpy, ekologııalyq aǵartýshylyq, ekologııalyq sanany kóterý jumysynyń bir bóligi retinde osy baıqaýdy Táýelsizdiktiń 30 jyldyǵy merekesine arnap mınıstrliktiń qoldaýymen birinshi ret uıymdastyryp otyrmyz. Aımaqtardaǵy ekologııa, janýarlar álemi problemalaryn osyndaı fotosýretter arqyly kórsetýdi maqsat tuttyq», deıdi National Geographic Qazaqstan jýrnalynyń bas redaktory Erkin Jaqypov.
Úsh kezeńnen turǵan baǵalaýdan keıin qazylar alqasy 4 atalym boıynsha jeńimpazdardy anyqtady. Qas qaǵym sátti máńgilik tarıhqa aınaldyrǵan Aleksandr Vlasıýk Melolontha týyndysymen top jarsa, belgili fotograf – Farhat Qabdyqaıyrov «Bábisek balapanyn tamaqtandyrý» atty eńbegimen kósh basynan kórindi. Qazaqstan peızajdary atalymynda «Han Táńiri» týyndysymen Ernur Manaphan dara shyqsa, Qazaqstan jan-janýarlary atalymynda Pavel Mıheev «Sopernık» atty fotosýretimen jeńimpaz atandy.
Sondaı-aq «Týranga Grýpp» kompanııasy atynan «Aıýsaı» atalymyn «Egemen Qazaqstan» respýblıkalyq gazetiniń fototilshisi, áriptesimiz Erlan Omar ıelendi. Ile-Alataý parkindegi áıgili shatqaldyń atymen atalǵan atalym ulttyq parkterdiń tabıǵatyn sheber beınelegen qatysýshylarǵa usynylady. Otandyq áýesqoı jáne kásibı fotograftar arasyndaǵy baıqaýdyń ár atalym jeńimpazyna 300 myń teńge syıaqy tabystaldy. Tabıǵat pen janýarlar álemin áıgilegen dodada top jarǵan fotosýretterdi qosa jarııalap otyrmyz.
ALMATY