Máýlen Áshimbaevtyń tóraǵalyǵymen palata bıýrosynyń otyrysy ótti. Onda depýtattar 2021 jylǵy 3 maýsymda ótetin Senat otyrysynyń kún tártibin qarady, dep habarlady Senattyń baspasóz qyzmeti.
Soǵan sáıkes, aldaǵy beısenbide senatorlar «Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkasııalaý týraly» zań jobasyn qaraıdy.
Bul kelisim kóshi-qon salasyndaǵy ekijaqty yntymaqtastyq úshin quqyqtyq negiz qalyptastyrýdy jáne zańsyz kóshi-qonǵa qarsy is-qımyl boıynsha birlesip áreket etýdi kózdeıdi. Qajet bolǵan jaǵdaıda taraptar anyqtalǵan kóshi-qon zańnamasynyń buzýshylyqtary, zańsyz kóshi-qon joldary, eki eldiń aýmaǵynda zańsyz kóshi-qondy uıymdastyrýǵa jáne júzege asyrýǵa qatysy bar zańdy jáne jeke tulǵalar týraly aqparat pen málimetterdi almasa alady.
Sondaı-aq bıýro otyrysynda Májilisten kelip túsken zań jobalary Senattyń turaqty komıtetterine bólinip berildi.