Qytaıdyń shyǵysyndaǵy Jıansý provınsııasynda 41 jastaǵy er adamnyń qus tumaýyn juqtyrǵany rastaldy. Bul – H10N3 vırýsyn adam juqtyrǵany týraly alǵashqy derek.
Qytaıda qus tumaýynyń birneshe túri taralǵan. Keıbir túri adamdarǵa da juǵady, ásirese qus baǵatyn azamattar arasynda aýrý jıi taraǵan. Degenmen, dál H10N3 vırýsynyń adamǵa juǵýy kezdespegen-di.
Jenjang qalasynyń turǵyny 28 sáýirde dárigerge shaǵymdanǵan. Bir aıdan keıin, 28 mamyrda onyń vırýs juqtyrǵany anyqtaldy. Alaıda Densaýlyq komıssııasy vırýstyń qaıdan jáne qalaı juqqany týraly aqparat bermedi.
Naýqastyń jaǵdaıy turaqty. Jaqyn qatynasta bolǵandardan vırýs anyqtalmady. Álem boıynsha da bul jalǵyz derek bolyp otyr.
H10N3 – tómen patogendi vırýs, asa kúrdeli aýrý týdyrmaıdy. Sonymen qatar koronavırýs sııaqty jahandyq pandemııaǵa sebep bolý qaýpi az.
Dúnıejúzilik densaýlyq saqtaý uıymy Reuters agenttigine naýqastyń vırýsty qaıdan juqtyrǵany anyqtalmaǵanyn, ázirge basqa naýqas tirkelmegenin aıtty. Sonymen qatar bul vırýstyń adamnan adamǵa juǵýy ekitalaı eken.
«Qus tumaýynyń bul túri adamǵa juqqany álemde tumaý pandemııasy áli de aıaqtalmaǵanyn bildiredi», dep málimdedi uıym.
Taǵam jáne aýylsharýashylyq uıymynyń úılestirýshisi Fılıp Klas muny «ádettegi vırýstardan bólek» dep baǵalaıdy. 2018 jylǵa deıin 40 jyl ishinde 160 jaǵdaı ǵana anyqtalǵan. Vırýs jabaıy jáne sýdy mekendeıtin qustardan tabylǵan. Qustar Azııa, Soltústik Amerıkany mekendeıdi. Bul ýaqytqa deıin birde-bir úı taýyǵynan anyqtalmapty.
Endi vırýstyń genetıkalyq aqparatyn zertteý onyń burynǵy vırýsqa uqsaıtynyn, ne uqsamaıtynyn nemese tipti birneshe vırýstyń qosyndysy bolý yqtımaldylyǵyn bilýge múmkindik bermek.
Qytaıda qus tumaýy indeti 2016-2017 jyl aralyǵynda tirkelgen. H7N9 vırýsy 1 668 adamǵa juǵyp, 616 kisiniń ómirin qıǵan.