Osy jyly 27 sáýir kúni respýblıkalyq Egemen Qazaqstan gazetinde atalǵan basylymnyń Jambyl oblysy boıynsha menshikti tilshisi Hamıt Esamannyń «Jeri – qazaqtiki, jaryǵy – qyrǵyzdiki» atty maqalasy jaryq kórgen bolatyn. Atalǵan maqalaǵa baılanysty Merki aýdany ákimdigi tarapynan daıyndalǵan jaýapty joldaımyn.
Merki aýdany Keńes aýyldyq okrýgine qarasty Jaýǵash batyr aýylynda jalpy 89 adam turady. Munda 23 tútin bar. Atalǵan aýyl aýdan ortalyǵynan 80 shaqyrym jerde ornalasqan. Qazirgi tańda Jaýǵash batyr aýyly kórshi Qyrǵyz memleketinen elektr qýatyn alýda. Osyǵan oraı, aýdan ákimdigi tarapynan ótken jyly jobalyq-smetalyq qujattama ázirleý maqsatynda tehnıkalyq shart alynyp jáne jobalaý-izdestirý jumystary ázirlendi. Tehnıkalyq shartqa sáıkes, qosylý núktesi Blogoveshenko aýylynda ornalasqan qosalqy stansasynan berilgen. Sonymen qatar atalǵan eldimekenge jáne «Qarataý» áskerı bólimshesine ornatylatyn transformatorlarǵa memlekettik akti ázirlendi.
Búginde Jambyl oblysy ákimdiginiń memlekettik satyp alý basqarmasy tarapynan memlekettik satyp alý konkýrsy ótkizilip, nátıjesi boıynsha jobalaýshy mekeme bolyp 15134,922 teńgege «Korporasııa «Asyl-Stroı» jaýapkershiligi shekteýli seriktestigi anyqtaldy. Qazirgi tańda jobalaýshy mekeme tarapynan topografıkalyq túsirilim jasaý jumystary júrgizilýde. Joba ázirlenip, saraptama qorytyndysy alynǵannan keıin, belgilengen tártippen bıýdjetten qarajat qaralyp, qurylys montajdaý jumystary júrgiziletin bolady.
Berik BEGALIEV,
Merki aýdany ákiminiń orynbasary