Halyqaralyq balalardy qorǵaý kúni merekesinde Osakarov aýdanynyń ákimi Nurken Qobjanov aýdan ortalyǵyndaǵy «Jastar» balalar men jasóspirimder ortalyǵyna baryp, ondaǵy kópbalaly otbasylardyń balalary jáne erekshe bilimdi qajet etetin jetkinshektermen kezdesti.
Osakarovka kentinde oryn tepken ortalyqta 534 oqýshyǵa bes baǵyt boıynsha qosymsha bilim beriledi. Atap aıtqanda, munda óskeleń urpaq ókilderi ǵylymı-tanymdyq, kórkemdik-estetıkalyq, mýzykalyq-teatrlyq, sporttyq jáne tehnıkalyq baǵytta bilim-tanymyn jetildirip, tulǵa retinde damý jolynan ótedi.
Sonymen qatar «Jastar» balalar men jasóspirimder ortalyǵynda Egor Shleı, Andreı Motorın, Aldııar Áýbákirov, Erasyl Baıǵonys jáne Vladımır Pshenıchnıkov sekildi múmkindigi shekteýli balalar tegin bilim alady. Jalpy, ortalyqta erekshe qajettiligi bar balalar úshin barlyq jaǵdaı jasalǵan. Atap aıtqanda, bul jerdegi qolaıly pandýs, qajetti oqý quraldary, tipti arnaıy jabdyqtalǵan dárethananyń ózi múmkindigi shekteýli balalardyń alańsyz oqyp, eshkimnen kemdik kórmeýine qaltqysyz qyzmet etedi. Budan bólek, olar ózderi qalaǵan úıirmeler men seksııalarǵa qatysyp, qosymsha bilim alady.
Aýdan ákimi Nurken Qobjanov balalardy merekemen quttyqtap, olarǵa densaýlyq, baqytty balalyq shaq tilep, ózimen birge ala kelgen syılyqtaryn tartý etti.