Shekteý sharalary uzartyldy

Bul, árıne úshinshi mega­po­lıste sońǵy aptalarda indet taralýdyń jaǵymsyz kórset­kish­teri eskerilip qolda­nylǵan shara. Mysaly, Shymkentte ótken táýlikte koronavırýs ın­fek­sııasynyń 46 jaǵdaıy tir­keldi. Onyń 15-i ınfeksııalyq stasıonarǵa jatqyzylyp, 31 adam úı baqylaýyna alyndy. Qa­lalyq densaýlyq saqtaý basqarmasynyń basshysy Baqytjan Pozılovtyń dereginshe, qa­­­zirgi tańǵa mamandandyrylǵan ınfeksııalyq stasıonarlarda barlyǵy 1 376 oryn bar, tósektik oryn tolymdyǵy – 37%, ıaǵnı 879 oryn bos. Infeksııalyq stasıonarda 505 naýqas, onyń 207-i koronavırýstan, 283-i pnevmonııa, 15-i tumaýdan emdelýde. Al jansaqtaý bóliminde 31 naýqas jatyr. Bir táýlik ishin­de qalada 2 647 adam vaksına alǵan. Jalpy, egý naýqany bastalǵaly barlyǵy 175 270 adam vaksınalandy. Onyń ishinde 85 233 adam vaksınanyń eki kom­ponentin aldy. Egilgen adamdardan keri áser baıqalmaǵan. Qalada vaksınalaýǵa 43 egý pýnk­ti jumyldyrylǵan, 320 termokonteıner daıyndalǵan.

Jyl basynan beri úshinshi megapolıste COVID-19 ınfek­sııasynyń 6 145 jaǵdaıy, al koronavırýs ınfeksııasynyń belgileri bar pnevmonııamen 512 jaǵdaı tirkelgen. Basqarma basshysynyń aıtýynsha, jyl basynan beri indet juqtyrǵan 5 010 naýqas emdelip shyqqan. Qazirgi tańda qala turǵyndaryna qyzmet kórsetetin, táýligine

6 070 test ótkizýge qaýqarly, 11 PTR zerthanasy jumys isteýde. Qala turǵyndaryn qajetti dá­rilik zattarmen qamtamasyz etý de basty nazarda. Bul oraıda jyl basynan beri 110 435 azamat tegin dárilik zattarmen qamtamasyz etilgen. Ol úshin 3,7 mlrd teńge jumsalǵan. Bul qarjy sozylmaly aýrýmen esepte turatyn naýqastarǵa, aýrýhanada jatqan azamattardy emdeý sharalary úshin bólingen. Stasıonarlyq deńgeıde bıyl jalpy somasy 5,845 mlrd teńge bolatyn dárilik zattar jáne medısınalyq buıymdardy jet­ki­zýge kelisim­shart jasalǵan. Sondaı-aq ambý­latorııalyq deń­geıdegi 38 medı­sınalyq uıymǵa 7,2 mlrd teńge somma­sy­na dárilik zattar jáne medı­sı­nalyq buıymdardy satyp alýǵa ótinim usynyldy. Satyp alý ótinimi boıynsha emhana deńgeıinde naýqastar tegin dári­men qamtamasyz etilmek.

Epıdahýaldyń turaqsyzdyǵy qarııalar men múmkindigi shek­teýli azamattarǵa da qıyn soǵýda. Qazaqtyń jalpaq tilimen aıt­saq, tórt qabyrǵaǵa qamalǵan qarııalar týǵan-týysyn aralap, boı jazǵysy keletini zań­dylyq. Degenmen búgingi jaǵ­daı­dy eskerip, densaýlyǵyna alańdaıtyn urpaǵynyń ata-ájesin úıden shyǵarǵysy joq. Osy oraıda aǵa býyn ókilderine shıpajaılardyń kóptep kómegi tııýde. Mysaly, Shymkent qala­synyń 1 myńǵa jýyq azamaty jyl basynan beri elimizdiń túrli shıpajaılarynda tegin emdeldi. Onyń ishinde 736 joldama zeınet jasyndaǵylarǵa, 393 joldama múgedektigi bar azamattarǵa berilgen. Búginde taǵy 4 myńǵa jýyq múmkindigi shekteýli aza­mattarǵa joldama berý josparlanýda. Qalalyq jumyspen qamtý jáne áleýmettik qorǵaý bas­qarmasy málimdegendeı, «Áleý­mettik portal» arqyly mú­ge­­dektigi bar azamattar úıinde otyryp-aq óz tańdaýy boıynsha qalaǵan shıpajaıyna tegin joldama ala alady. Bıyl Shymkentte ornalasqan «Densaýlyq» shıpajaıy men Túlkibas aýdanyndaǵy «Aqsý-Jabaǵyly» jáne Taraz qalasyndaǵy «Aısha bıbi» shıpajaılary qyzmet kórsetýde.