Jaqsylyq jasaýǵa umtylǵandar ózderiniń aq nıeti oryndalatyn ońtaıly joldy taba biledi eken. Taıaýda Stepnıak qalasyndaǵy azyq-túlik dúkenderinde jóni basqa, josyǵy bólek, janashyrlyǵy mol jaqsylyq sóresi paıda boldy.
Shaǵyn qalanyń turǵyndaryn eleń etkizgen jaqsylyq sóresin uıymdastyrýǵa aýdan ákiminiń orynbasary Orynbasar Ahmetova, aýdandyq jumyspen qamtý jáne áleýmettik baǵdarlamalar bóliminiń basshysy Yrysjan Ábjanova uıytqy bolypty. Shapaǵat shýaǵyn tógip turatyn baǵaly bastamany «Az-alı» dúkeniniń ujymy birden qoldaı ketken. Atalǵan is-sharaǵa kez kelgen adam qatysa alady. Qaıyrymdylyq aksııasy barysynda arnaıy ashylǵan sórege jany jomart qala turǵyndarynyń kez kelgeni áldebir taýardy satyp alyp, qoıyp ketse bolǵany. Osy jerden áleýmettik jaǵynan az qamtylǵan nemese qoly qysqa adamdar qajetti zatyn tegin alady. Qaıyrymdy jandar kúndelikti suranysqa ıe taýarlarǵa basymdyq berip otyr.
El ishi qashanda keń emes pe?! Árıne, bul arada qala turǵyndary qamqorlyq ataýlydan qaǵajý qalyp, áldekimge qol jaıyp otyr degen uǵym týmasa kerek. Eń bastysy, qaıyrymdylyqtyń búr jaryp, kóktegen jeri osy dep aıtsaq, artyq bolmas edi. Eresekterdiń osy bir ádemi áreketin kórgen balalar da ata-analary balmuzdaq al dep bergen azyn-aýlaq tıyn-tebenin jaqsylyq sóresine jumsaǵanyn kórgen jannyń kóńili gúldep keter edi. Qazir jaqsylyq sóreleri qajetti zatqa toly. Tipti, qoıarǵa oryn bolmaı tur dep aıtýǵa bolady. Zat emes, qamqor kóńildiń aq nıeti ǵoı tolyp turǵan.