Danııar Eleýsinov kásipqoı boksqa aýysqannan keıin Qazaqstan quramasynyń jańa kapıtany retinde bapkerler alqasy biraýyzdan Ádilbek Nııazymbetovti taǵaıyndaǵan bolatyn. Osy jóninde ulttyq quramanyń bas jattyqtyrýshysy Myrzaǵalı Aıtjanov óz pikirin bildirdi. Bul týraly sports.kz habarlady.
«Ádilbektiń kandıdatýrasyn Vasılıı Levıt usynǵan edi. Nııazymbetov osy mindetke laıyq degen pikirge kelgendikten, qabyl aldyq. Sebebi, tájirıbesi de, jetistikteri de kóp, sondaı-aq áriptesteriniń arasynda bedeli de joǵary. Bul jaýapkershilikti Tokıo Olımpıadasyna deıin laıyqty atqaratynyna senimdimin Onyń basty mindeti – qıyn kezde komandaǵa jiger berip, aýyzbirshilikti odan ári nyǵaıtý», – dedi Myrzaǵalı Aıtjanov.
Aıta keteıik, jańarǵan boks quramasy 25 qańtarǵa deıin Dúnıejúzilik boks akademııasynda jalpy fızıkalyq daıyndyq jıynyn ótkizdi. Jaqyn arada olar Vengrııa men Bolgarııada ótetin dástúrli týrnırge qatysady. Al 6-20 aqpan kúnderi akademııada AQSh, Germanııa boksshylarymen birge jattyǵady.