Qazaqstandyq tennısshi Elena Rybakına Parıjde ótip jatqan júlde qory 34 367 216 evrony quraıtyn «Rolan Garros» týrnıriniń úshinshi kezeńine shyqty, dep habarlaıdy Egemen.kz.
Tusaýkeser kezdesýinde fransııalyq Elza Jakemonyń tas-talqanyn shyǵarǵan jerlesimiz ekinshi aınalymda Nao Hıbınomen sheberlik baıqasty. Álemdik reıtıngte 81 orynda turǵan Japonııanyń 26 jastaǵy tennısshisi Rybakınaǵa laıyqty qarsylyq kórsete almady. 1 saǵat 03 mınýtke sozylǵan saıys 6:3, 6:1 esebimen aıaqtaldy. Endi ol Elena Vesenınamen kúsh synasady. 34 jastaǵy Reseı tennısshisi kóbine-kóp juptyq básekelerde sátti óner kórsetti. Atap aıtsaq, 2013 jyly Rolan Garrosta, 2014 jyly AQSh-tyń ashyq birinshiliginde jáne 2017 jyly Ýımbldonda top jardy. Kezinde úzdikter tiziminde 13 oryndy ıelengen Vesenına bul týrnırdiń tusaýkeser saıysynda belarýssııalyq Olga Govarsovaǵa tize búktirse, ekinshi kezeńde chehııalyq Petra Kvıtovamen kezdesýge tıis edi. Alaıda ol jaraqatyna baılanysty kortqa shyqqan joq.
Sondaı-aq búgin Zarına Dıas álemniń 15 raketkasy, belgııalyq Elıse Mertenspen kezdesedi.