Boıaýmen beınelengen óleńder

Atalǵan kórmeni Almaty qalalyq mádenıet basqarmasy men aqyn týǵan ólke Raıymbek aýdanynyń ákimdigi uıym­dastyrdy. Saltanatty ashylý rásimi «Almaty galereıasy» ǵımaratynyń aldynda ótti. Oǵan elimizge belgili óner jáne mádenıet qaıratkerleri, qalam­ger­ler, aqynnyń urpaqtary, jerlesteri, qala turǵyndary qatysty. Juldyz Muqa­­ǵalıuly men Halyqaralyq «Maqa­taev» qorynyń tóraıymy Baqytgúl Aıda­rova-Maqataıkelini muqaǵalıtanýǵa úles qosqan sýretshilerdiń ıgi isterine aqyn áýleti atynan alǵys aıtty. Sondaı-aq Raıymbek aýdany ákiminiń orynbasary Ǵalym Jýsanbaev, aqyn-jazýshylar Baqyt Bedelhan men Dúısen Maǵlumovtar izgi lebizderin arnady.

«Poezııa mahabbattan bastalyp, parasat­pen aıaqtalýy kerek» dep aıtqan edi Muqań. Meniń oıymsha, aqyn bul jerde tek poezııany ǵana meńzep otyrǵan joq. Búkil dúnıe bolmys osyndaı sabaq­tas­tyqta bolsa eken dep armandady. En­de­she, biz de Muqaǵalıdyń mereıto­ıyn keń aýqymda uıymdastyryp, ony taǵy­­lymdy, parasatty sharalarǵa ulas­ty­­rýymyz qajet. Búgingi ashylyp otyr­ǵan qylqalam sheberleriniń kórmesi osy oıymyzdyń dáleli», dedi Qazaq­stan Jazýshylar odaǵy basqarma tóraǵasy­nyń orynbasary Baqyt Bedelhan.

Belgili óner qaıratkeri Shaıahmet Imash­uly aqynnyń jyr shýmaqtaryn naqy­shyna keltirip jatqa oqydy. Myna bir sáıkestikke de tańǵalasyz, atalǵan shara týra Jambyl Jabaev eskertkishiniń aldynda ótti. Jyr alyby Muqaǵalı bala­synyń óleńderin tebirene tyńdap turǵandaı. Bul kórinis kópshilikti erekshe áserge bóledi.

«Muqaǵalıdyń armany, tańǵy shyq­taı móldiregen taza pák sezimi, saǵy­ny­shy, eline, jerine degen mahabbaty – ómir­di ­boıaýmen zerdelegen sýretshiler eń­begine taptyrmaıtyn qural. Sondyqtan qyl­qalam sheberleri de aqyn rýhymen syrlasýǵa barynsha den qoıǵan. Ná­tıjesinde, san alýan týyndylar qyl­qa­lammen jazyldy. Beıneleý ónerinde Ma­qataevtyń máńgilik kóshi toqtaýsyz alǵa qaraı jyljyp barady», dedi Qazaq ulttyq pedagogıka ýnı­­­versıtetiniń О́ner, mádenıet jáne sport ınstıtýtynyń dırektory Toqqoja Qojaǵulov.

Budan keıin jınalǵan qaýym ǵıma­rat ishine enip, kórmege qoıylǵan sýret­terdi tamashalady. Aqyn poezııasyna alǵashqy­lardyń biri bolyp moıyn bur­ǵan belgili grafık-sýretshi Temirhan Or­dabekov. Onyń «Rekvıem», «Joqtaý», «Sýyq kúz» jáne taǵy basqa eńbekteri­ne zer salsańyz, poezııanyń tereńine boı­laısyz. Aq pen qara tús astasyp, Mu­qa­ǵalıdyń qarama-qaıshylyqqa toly kúr­deli ómirin dál beınelegen. Onyń asta­ryna úńilgen saıyn fılosofııa­lyq oı-tolǵamdarǵa jolyǵasyz. Sondaı-aq kórmede sýretshiler – Ba­ýyr­­jan Naı­manov pen Jaqsylyq Toba­jan­dardyń da shy­ǵarmalary kórermendi ádemi áserge bóledi. Sóz óneri men sýret óneri bir-biri­men sonshalyqty úılesip ketkendeı.