Asqar Mamın «Nur Otan» partııasynyń saılaýaldy baǵdarlamasynyń jol kartasyn iske asyrý jónindegi shtab otyrysyn ótkizdi, dep habarlaıdy Egemen.kz QR Premer-Mınıstriniń resmı saıtyna silteme jasap.
Qazaqstandyq taýarlar men qyzmetterdiń shıkizattyq emes eksportynyń kólemin arttyrý, eksportqa baǵdarlanǵan munaı-gaz hımııasy ónimderi óndirisiniń ósýin qamtamasyz etý, sondaı-aq mektepterdi salý jáne jańǵyrtý máseleleri qaraldy.
Saýda jáne ıntegrasııa mınıstri Baqyt Sultanov, ındýstrııa jáne ınfraqurylymdyq damý mınıstri Beıbit Atamqulov «Nur Otan» partııasynyń saılaýaldy baǵdarlamasyn iske asyrý aıasynda 2025 jylǵa qaraı shıkizattyq emes eksport kólemin 2 ese $41 mlrd deıin arttyrý mindeti qoıylǵanyn baıandady.
Jahandyq pandemııanyń saýda-logıstıkalyq baılanystarǵa áserin jáne ótken jylǵy kórsetkishterdiń tómendeýin eskere otyryp, bıyl eksporttaýshylardy memlekettik qoldaý – saqtandyrý, shyǵyndardy óteý jáne eksporttyq akselerasııa sharalaryn iske asyrý jolymen QR shıkizattyq emes taýarlary men qyzmetteriniń eksportyn ulǵaıtýdy qamtamasyz etý kózdelgen. 2021 jyly shıkizattyq emes eksportty jedel damytý aıasynda maıly daqyldar tuqymdary, munaı-hımııa ónimderi, ósimdik maıy, et jáne sýbónimder, transformatorlar, pestısıdter, AT-qyzmetter, jolaýshylardyń tranzıttik tasymaldary, týrıstik qyzmetter jáne t. b. basym taýarlar men kórsetiletin qyzmetter bolyp aıqyndaldy.
Qazirgi ýaqytta QR shıkizattyq emes eksportynyń 60%-dan astamyn Qaraǵandy (25,1%), Shyǵys Qazaqstan (12,2%), Pavlodar (11,9%) oblystary jáne Almaty qalasy (11,9%) quraıdy. Energetıka mınıstri Nurlan Noǵaev «Nur Otan» partııasynyń saılaýaldy baǵdarlamasyn iske asyrý jónindegi jol kartasy 2025 jylǵa deıin Atyraý, Oral jáne Shymkent qalalarynda munaı men gazdy tereń óńdeý jónindegi 5 zaýytty iske qosýdy kózdeıtinin aıtty, bul eksportqa baǵdarlanǵan 2 mln tonna munaı-gaz hımııasy óniminiń óndirisin qamtamasyz etýge múmkindik beredi (2019 jylmen salystyrǵanda 9 ese ósti). 2021 jyly Atyraý oblysynda qýaty 57 mln tekshe metr azot pen 34 mln tekshe metr syǵylǵan aýany quraıtyn tehnıkalyq gaz shyǵaratyn zaýyt paıdalanýǵa berildi.
Osy jyldyń sońyna deıin Shymkent qalasynda qýaty jylyna 57 myń tonna efır jáne 81 myń tonna polıpropılendi quraıtyn metıl-tret-býtıl efıri men polıpropılen óndiretin zaýyttyń qurylysyn aıaqtaý josparlanýda. Atyraý oblysynda qýaty jylyna 500 myń tonna polıpropılen óndiretin zaýyt qurylysynyń jobasy da aıaqtalý satysynda.
Atalǵan jobalar boıynsha ınvestısııalardyń jalpy kólemi $2,7 mlrd quraıdy. 2025 jylǵa deıin Atyraý oblysynda qýaty jylyna 430 myń tonna polıetelentereftalat óndiretin zaýyttyń, sondaı-aq Batys Qazaqstan oblysynda qýaty jylyna 130 myń tonna metanol óndiretin zaýyttyń qurylysy aıaqtalatyn bolady.
Eki joba boıynsha ınvestısııalardyń jalpy somasy $1,2 mlrd quraıdy. Bilim jáne ǵylym mınıstri Ashat Aımaǵambetov «Nur Otan» partııasynyń saılaýaldy baǵdarlamasyn iske asyrý aıasynda 2021 jyldan bastap 2025 jylǵa deıingi kezeńde elimizde 800 jańa mektep salynatynyn aıtty. Bıyl 200 mektep salý josparda bar. Premer-Mınıstr jergilikti atqarýshy jáne tıisti ortalyq memlekettik organdarǵa 2025 jylǵa deıin shıkizattyq emes eksporttyń kórsetkishterine qol jetkizý, onyń ishinde salalar men óndiris kólemi boıynsha esepteýler júrgizýdi tapsyrdy.
Úkimet basshysy ortalyq memlekettik jáne jergilikti atqarýshy organdarǵa mektepterdi salý men jańǵyrtý boıynsha barlyq mindettemelerdi sapaly oryndaýdy qamtamasyz etý jóninde birqatar naqty tapsyrma berdi.