«Kovboımen» kúsh synasady

Shavqat 1994 jyly О́zbek­stannyń Sýrhandarıa oblysyn­da jaryq dúnıe esigin ashty. 16 jasynda ata-anasymen bir­ge Qazaqstanǵa kóship kelip, Qa­ra­ǵandy qalasyna qonystandy. Kúnkóris qamymen jastaıynan qara jumysqa aralasqan ol jergilikti bazarlardyń birinde júk tasýshy bolyp ta eńbek etti. Sonymen qatar bos ýaqytyn­da sportpen shuǵyldanyp, jekpe-jek óneriniń san túrin jetik meńgerdi. Áýelde áýesqoılar sa­­­ıy­synda baq synap, túrli ja­rys­­tarda mol oljaǵa keneldi. So­lardyń arasyndaǵy Rahmo­nov­tyń eń iri tabysy – MMA-dan 2013 jyly álem chempıony atanýy.

Kásipqoılar arasynda ózi­niń tusaýkeser kezdesýin Shav­qat 2014 jyldyń qazan aıyn­da ótkizip, reseılik Adam Sý­rov­ty qylqyndyryp tastady. Sol kezden beri 13 ret aıqas alań­yna shyqqan qandasymyz bar­lyq básekeni óz paıdasyna sheshti. Bir keremeti, sol jek­pe-jekterdi ol túgeldeı mer­ziminen buryn aıaqtady. Tar­qatyp aıtsaq, Rahmonov polshalyq Bartosh Hyrek pen Mıhal Vınsek, qyr­ǵyzstandyq Rınat Saıakbaev, brazılııalyqtar Markýs Vı­nıshıýs, Marselo Brıto jáne Tıago Varejao Laseredony birinshi raýndta-aq tas-talqan etip jeńdi. О́ziniń otandasy Ádil Bo­ranbaev, ko­reıalyq Iýn Ion Pak jáne re­seılik Ivan Solodovnık pen Danıla Prıkazany ekinshi ke­zeńde oısyrata utty. Tek tájik­standyq Farıdýn Odılov qana birazǵa deıin shydady. Biraq qa­zaq sportshysy onyń da osal jerin tapty. Shavqattyń aýyr soq­qy­laryna shydaı almaǵan Farıý­dın úshinshi raýndtyń bel orta­synda óziniń jeńilgenin moıyndady.

2019 jyldyń 30 mamyryn­da Almatyda ótken jarys­ta Shavqat Rahmonov Danıla Prı­­kazany jyǵyp alyp, aýyr soq­qylaryn qarsha boratty. Reseılik sportshynyń qorǵanýǵa shamasy kelmedi. Onyń sharasyz kúıin kórgen tóreshi sol mezet­te básekeni toqtatýǵa máj­búr boldy. Osy jeńistiń arqa­synda qazaqtyń uly M-1 Global nusqasy boıynsha altyn belbeýdi ıelendi. Arada bir aı ótpeı jatyp ol Tıago Varejao Laseredomen kúsh synasty. Bul jekpe-jek birinshi raýndta aıaq­taldy. Qarsylasyn esinen tan­dyrǵan jeńisiniń nátıjesinde Rahmonov chempıondyq ataǵyn saqtap qaldy.

Qarsy kelgenderdiń barly­ǵyn qoǵadaı japyrǵan jigit kóp uzamaı UFS-degi maıtalman mamandardyń qyraǵy nazaryna ilikti. 2019 jyldyń shilde aıynda Shavqat aralas jekpe-jek álemindegi eń beldi uıymmen kelisimshartqa otyrdy. Osylaısha, áıgili promoýshende óner kórsetý múmkindigine ıe bolǵan Qazaqstannyń tuńǵysh sportshysy retinde onyń esimi tarıhta qaldy.

Jer-jahandy jaılaǵan koro­navırýs indetine baılanys­ty Shavqat Rahmonovtyń UFS-degi tusaýkeser kezdesýi birneshe már­te keıinge shegerildi. Qazaq­standyq jankúıerler sol sát­ti taǵatsyzdana kútti. Aqyry ol byl­tyrǵy jyldyń 24 qazanyn­da alǵash ret oktagonǵa shyqty. 26 jastaǵy jerlesimizdiń Ábý-Dabıdegi qarsylasy Aleks Olı­veıra edi. 33 jastaǵy Brazı­- ­lııanyń saqa sportshysy sol kezge deıin 30-dan asa jekpe-jek ótkizip, sonyń basym bóligin óz paıdasyna sheshti. Biraq ol da qazaqtyń qarýly jigitine jarytyp qarsylyq kórsete almady. Birinshi raýndtyń aıaqtalaýyna 20 sekýnd qalǵanda Rahmonov Olı­veırany «qylqyndyrý» ádisi­men tyrp etkizbeı utty. Temir qur­saýdan qutyla almaıtynyna anyq kózi jetken brazılııalyq kókjaldyń jer toqpaqtaýdan basqa amaly qalmady.

Álemdegi eń beldi promoý­shen­degi óziniń ekinshi kezdesýin Shavqat Mıshel Prazereske qar­sy ótkizetinin biz joǵaryda aıt­tyq. Jasy 40-qa taıap qalǵan Bra­zılııanyń Belen qalasynyń týmasy 2000 jyldan beri osy sport túrin serik etýde. «Kovboı» de­gen laqap atpen tanymal Mıshel­diń djıý-djıtsýdan qara bel­beýi bar. Alǵashqy 13 jylda 16 márte oktagonǵa shyqqan ol barlyq bá­sekede basymdyq tanytty. Sol kezderi Prazereske UFC-ten usy­nys tústi.

Beldi uıymnyń týy astynda ótken jarystarda da Prazeres ózin jaqsy qyrynan kórsetti. Osy kúnge deıin barlyǵy 29 márte jekpe-jekke shyqqan bra­zılııalyq 26 ret basymdyq tanytty. 12 kezdesýin merziminen bu­ryn aıaqtady. Ár jyly ol Fred­rık Samýraı, Djessı Ronson, Maırbek Taısýmov, Gılbert Berns, Resmond Grın, Zak Kam­mıngs syndy sańlaqtardy san soqtyrdy. Sporttyq karerasyn­da Ońtústik Amerıkanyń oǵlany tek úsh ret upaı sanymen utyldy. Mıshel óziniń otandasy Paýlý Tıagý, amerıkalyq Kevın Lı jáne aýstrııalyq Ismaıl Naýr­dıevke ǵana ese jiberdi.  

Esterińizge sala keteıik, 26 maýsymda AQSh-tyń Las-Vegas qalasynda ótetin jarystyń bas­ty básekesinde asa aýyr sal­maqtaǵy reseılik Aleksandr Vol­kov pen fransııalyq Sırıl Gana aıqasady. Boıy 2 metrden asa­tyn 32 jastaǵy orys alyby kúni búginge deıin 41 kezde­sý ótkizip, 33 ret jeńis to­ıyn toılady. 31 jastaǵy Sırıl Gan­nyń boıy 195 santımetr. Ol kásip­qoı­lar arasynda 2018 jyldan beri óner kórsetýde. Sol kezden beri segiz ret oktagonǵa shyqqan Fran­sııanyń ókili birde-bir ret jeńilistiń kermek dámin tatqan emes.