Facebook Inc ótken aptada AQSh-tyń burynǵy prezıdenti Donald Tramptyń áleýmettik jelidegi paraqshasyn 2023 jylǵa deıin buǵattady. Sondaı-aq kompanııanyń erejelerin buzǵan kez kelgen álem basshysyna da osyndaı shara qoldanatynyn eskertti.
Esterińizde bolsa, Facebook kompanııasy 6 qańtarda Kapıtolııge jasalǵan shabýyldan keıin zertteý júrgizip, Tramp buzaqylyqqa shaqyrǵanyn alǵa tartyp, onyń akkaýntyn ýaqytsha óshirgen-di. Endi eki jylǵa buǵattaýǵa sheshim qabyldady.
Tramptyń Twitter-ge kirýine birjola tyıym salynǵan. Kapıtolııge jasalǵan shabýyldan keıin Alphabet kompanııasy YouTube-ke kirýin ýaqytsha shektedi. Tramp jaqynda ǵana jeke blog ashqan, biraq kóp uzamaı ol da jabylyp tastaldy. Áıtse de, ol óziniń jeke platformasyn ashýdy josparlap otyrǵanyn málimdedi.
«Tramp myrzanyń qyzmetinen ýaqytsha shettetilýine sebep bolǵan jaǵdaılardyń aýyrlyǵyn eskere otyryp, onyń áreketteri bizdiń erejelerimizdiń óreskel buzylýyna ákep soqtyrdy dep sanaımyz. Bul hattamalarymyzǵa sáıkes eń joǵary jazaǵa laıyq áreket», dedi Facebook-tiń jahandyq máseleler jónindegi basshysy Nık Kleg.
О́z kezeginde Tramp bul sheshimdi senzýranyń bir túri jáne saılaýshylaryna til tıgizý dep synady. Osylaısha, 2022 jylǵy qarashada ótetin aralyq saılaýda Tramp áleýmettik jelisiz qalmaq. Degenmen, kelesi prezıdenttik saılaýda paraqshasyn qaıta asha alady.
«Facebook-tiń sheshimi – 2020 jylǵy óreskel buzylǵan prezıdenttik saılaýda bizge daýys bergen 75 mıllıon adamdy qorlaý. Mundaı senzýra men únsizdikke jol berýge bolmaıdy. Biz jeńiske jetemiz. Elimiz endi mundaı qorlyqty qabyldaı almaıdy», dedi D.Tramp óz málimdemesinde.
Sonymen qatar Tramp Aqúı tizginin qolyna ustaı qalsa, Facebook-tiń negizin salǵan Mark Sýkerbergti «ońdyrmaıtynyn» ymmen jetkizdi.