Qarjy ortalyǵyna – 800-shi kompanııa

Komıtet ókilderiniń aıtýynsha, AHQO qyz­me­tine qyzyǵýshylyq artyp, qatysýshylardyń sany ulǵaıyp keledi. Qazir munda 53 eldiń kompanııa­lary tirkeldi. Olardyń qatarynda Qazaqstan, Ulybrıtanııa, AQSh, QHR, RF, Estonııa, Latvııa, Italııa, Fınlıandııa, Ońtústik Koreıa, Sıngapýr, Malaızııa, Úndistan, BAÁ, Túrkııa jáne basqa da memleketterdiń kommersııalyq uıymdary bar. Atalǵan kompanııalar bank, saqtandyrý, qor naryǵy, aktıvterdi basqarý, jeke bankıng, ıslamdyq qarjylandyrý, kredıttik reıtıngter, zańgerlik keńes berý, býhgalterlik esep, holdıngtik kompanııalar qyzmetteri jáne basqa da kóptegen salada qyzmet túrlerin usynyp keledi.

«Taǵy bir jetistigimizdi, atap aıtqanda qa­tysýshy kompanııalardyń sany 800-ge jetkenin qýanyshpen habarlaımyz. AHQO-da jumys isteýge sheshim qabyldaǵan kompanııalar onyń artyqshylyqtaryn, naqty aıtsaq aǵylshyn quqyǵy men salyqtyq jeńildikterdi, sondaı-aq sheteldik ınvestorlardy qorǵaý tetigin qoldanyp, óz bıznesin damytýǵa umtylady. Iskerlik belsen­dilik pen óńirge ınvestısııa tartýǵa arnalǵan ınfra­qurylymdy damytýǵa baılanysty jumys­ty jalǵastyryp, qarqynymyzdy kúsheıte túse­miz», dedi AHQO Qarjylyq qyzmetter kórsetýdi ret­teý jónindegi komıtetiniń bas dırektory Muhtar Bóbeev.

Byltyrdan beri bul komıtet tirkeý rásimderin toly­ǵymen sıfrlandyrdy. Bul tirkeý prosesin orta­sha eseppen 3-5 kúnnen 1 kúnge deıin qys­qar­týǵa múmkindik berdi. Tirkeý rásimderimen birge keıbir retteletin qyzmet túrlerin lısenzııalaý barysy, qarjy-tehnologııalyq kompanııalardy akkredıtteý jáne lısenzııalaý rásimderi sıfr­landyryldy.

Eske sala keteıik, Qarjylyq qyzmetter kórse­tý­di retteý jónindegi komıtet (AFSA) – Astana halyqaralyq qarjy ortalyǵynda qarjy­lyq qyzmetterdi jáne onymen baılanysty qyzmetti baqylaý maqsatynda qurylǵan táýelsiz retteýshi sanalady. AHQO erejeleri qarjy kompanııalary men naryq ınstıtýttaryn lısenzııalaýdy, tirkeýdi, akkredıtteýdi jáne qadaǵalaýdy qamtamasyz etedi.