Pákistanda eki júrdek poıyz soqtyǵysyp, kemi 30 adam qaza taýyp, júzden astam jolaýshy jaraqat aldy. Millat Express jáne Sir Syed Express kompanııalaryna tıesili poıyzdar eldiń ońtústigindegi Sındh provınsııasy mańynda soqtyǵysqan.
Jergilikti bıliktiń habarlaýynsha, jaraqattanǵandar men qaza tapqandardy úıindi astynan shyǵarý áli júrip jatyr. Qutqarý jumystaryna taıaý mańdaǵy aýyl turǵyndary da jumyldyrylǵan. Apat ornyna qutqarý jumystaryna qatysý úshin áskerıler de kelgen.
Millat Express poıyzynyń astynda jıyrma shaqty jolaýshy qalǵan. Sındh provınsııasyndaǵy Gotkı aýdanynyń polısııa sherıfi Ýmar Týfaıldyń aıtýynsha, olardy qutqarý úshin aýyr tehnıka aldyrylmaq.
Gotkı komıssarynyń orynbasary Ýsman Abdýllanyń sózine súıensek, Millat Express relsten shyǵyp ketip, ile ony Sir Syed Express poıyzy kelip soqqan. Ázirge relsten shyǵyp ketý men soqtyǵysýǵa ne áser etkeni belgisiz.
«Aldymyzda turǵan mindet – synyqtardyń astynda qalǵan jolaýshylardy tez arada qutqarý», deıdi Ý.Abdýlla. Onyń aıtýynsha, qazirdiń ózinde 30 adam qaza tapqan. Temir jol ókilderi eki poıyzda shamamen myńǵa jýyq jolaýshy bolǵanyn aıtyp otyr. Sondaı-aq aman qalǵandardy ornalastyrý jumystary da júrip jatyr.
Jergilikti BAQ-tyń habarlaýynsha, jolaýshylardyń bir bóligi Millat Express poıyzymen úılený toıyna bara jatqan. Biraq qaıtys bolǵandar men jaraqat alǵandardyń arasynda olardyń bar-joǵy belgisiz.
Teledıdar kadrlarynda jaraqat alǵan jolaýshylardy aýrýhanalarǵa jetkizip jatqan jedel járdem mashınalary kórsetilgen. Pákistan telearnalarynyń málimetinshe, apattan keıin tórt saǵat ótse de aýyr tehnıka oqıǵa ornyna jetpegen.
Pákistan temirjol qyzmeti ókilderi tergeýge tapsyrys bergenderin jáne qutqarý jumystary áli jalǵasa beretinin aıtty. Jaraqat alǵan jolaýshylardyń keıbireýleri aýrýhanada aýyr halde jatyr.
Pákistanda poıyz apattary jıi kezdesedi. Soǵan qaramastan, bılik eskirgen sıgnal júıesin jańartýǵa, tozǵan temir joldardy aýystyrýǵa kóńil bólmeıdi. Máselen, Pákistannyń ońtústiginde 1990 jyly jolaýshylar toly poıyz júk poıyzyna soqtyǵysyp, osy el tarıhyndaǵy eń aýyr temirjol apatynda 210 adam qaza tapqan.