Mindetti áleýmettik medısınalyq saqtandyrý boıynsha qazaqstandyqtar kez kelgen medısınalyq mekemede stomatologııalyq qyzmetti ala alady. Bul týraly «Áleýmettik medısınalyq saqtandyrý qory» KEAQ Almaty qalalyq fılıaly dırektory Tleýhan Ábildaev málim etti, dep habarlaıdy Egemen.kz.
Onyń aıtýynsha, 2020 jyldan bastap stomatologııalyq qyzmet aqysyn tóleý shemasy ózgerdi. Buryn qyzmet aqysy konsýltatıvtik-dıagnostıkalyq qyzmet kórsetetin klınıkaǵa tikeleı aýdarylatyn bolsa, bıyldan bastap emhanalar arqyly tólenedi. Ol úshin emdeý uıymdary arasynda qosymsha kelisimshart bekitiledi.
«Saqtandyrý engizilgenge deıin stomatologııalyq kómek tek pasıenttiń tirkelgen emhanasy arqyly ǵana kórsetiletin. Jańa júıeniń arqasynda atalǵan sanattaǵy azamattar bul qyzmetti elimizdiń kez kelgen jerinde paıdalana alady», dedi Tleýhan Ábildaev.
MSQ qalalyq fılıaly málimetine súıensek, azamattardyń jekelegen sanattary, dálirek aıtqanda, 18 jasqa deıingi balalar men júkti áıelder ambýlatorııa deńgeıindegi stomatologııalyq kómekti saqtandyrý paketi arqyly ala alady. Olar: tisti jansyzdandyrý, plomba salý, terapevtiń qabyldaýy, pýlpıt pen perıodontıtti emdeý, gıpoplazııa men flıýoroz saldarynan anatomııalyq pishini buzylǵan tisti tolyq qalpyna keltirý syndy taǵy da basqa qyzmetterdi paıdalana alady.
Sonymen qatar tisti juldyrý, til men erin júgenshigindegi aqaýdy joıý, jaqty rentgenge túsirý, anestezııa syndy qyzmetter de osy paket sheńberinde kórsetiledi. Al, shuǵyl stomatologııalyq kómek burynǵysha memleket tarapynan kepildendirilgen tegin medısınalyq kómek paketinde qaldyryldy.
Shuǵyl kómekke: 18 jasqa deıingi balalar, júkti áıelder, Uly Otan soǵysynyń qatysýshylary, 1,2,3 toptaǵy múgedekter, «Altyn alqa», «Kúmis alqa» ıelengen kóp balaly analar, ataýly áleýmettik kómek alýshylar, jasyna qaraı zeınetke shyqqan zeınetkerler, juqpaly, áleýmettik mańyzy bar aýrýlar men qorshaǵan ortaǵa qaýip tóndiretin syrqattarǵa shaldyqqan pasıentter júgine alady.