Qazaqstandyq sportshy Malıka Muhtarova para bıden Italııada ótken Álem Kýbogynda kúmis júldege ıe boldy, dep habarlaıdy Egemen.kz elorda ákimdiginiń resmı saıtyna silteme jasap.
«Sezimimdi sózben aıtyp jetkize almaımyn. Biraq, shynymdy aıtsam, ózimniń qoıylymyma 100 paıyz kóńilim tolmady. Bul karantınnen keıingi alǵashqy halyqaralyq jarys, sondyqtan bári áli alda. Jarysta kútpegen jaǵdaılar boldy, mysaly jurt aldyna shyǵar aldynda kóılegimniń belbeýi jyrtylyp qaldy. Ony parketke shyǵar aldynda ǵana tikti. Arbam da synyp qala jazdady. Biraq, bizdiń quramamyzǵa eshnárse kedergi keltire almaıdy», dep bólisti oıyn Malıka.
Báseke Genýıa qalasynda ótti. Onda Qazaqstan namysyn 4 sportshy qorǵady. Álem Kýbogy 2022 jyly Koreıada ótetin álem chempıonatyna tikeleı irikteý bolyp sanalady. Jarysqa álemniń 12 elinen 300-den astam sportshy qatysty.
«Men eshqandaı nanym-senimge senbeımin. Meniń ómirlik uranym: «Men bolmasam kim?» nemese «Menen basqa bul maqsatqa kim jetedi». Para bı – men úshin ózimdi fızıkalyq turǵyda shyńdaý, shydamdylyǵymdy tekserý, al eń aldymen komandanyń birligi. Osynyń bári alǵa umtylýyma motıvasııa beredi», deıdi Malıka Muhtarova.
Aıta keteıik, tóreshiler brıgadasyna Qazaqstannyń eńbek sińirgen jattyqtyrýshysy, elordalyq para bı mektebiniń jattyqtyrýshysy Álııa Maıdanqyzy shaqyryldy. Irikteý Ulttyq paralımpıada komıtetiniń sheshimimen jáne jeke komıssııanyń sheshimimen ótti.