Memleket halyq únine qulaq asa ma? Shyǵys Qazaqstanda shyryldaǵan kásipkerler Prezıdent Qasym-Jomart Toqaevtan taǵy kómek surady, dep habarlaıdy Egemen.kz.
Aıtýlarynsha, Shyǵysta memlekettik satyp alý júıesin jemqorlyq jaılap alǵan. О́ńirdegi bir top kásipkerler tenderdi ádiletsiz ótkizýdi ádetke aınaldyrǵan bılik ókilderin jaýapkershilikke tartýdy talap etip otyr. Oılaryn ortaǵa salǵan kásipkerlerdiń qatarynda máslıhat depýttattary da bar.
Kásipkerlerdiń kótergen máselesi jalqy; tenderdiń ádil ótýi. Shyǵystaǵy belgili kásipker Erjan Sqaqov oblystyq ákimdiktiń ókilderi qoıǵan shartpen kelispegen. Sodan beri kompanııasy tenderden negizsiz qaǵylyp qalyp júr. Jalpy, sońǵy jyldary óńirde memlekettik satyp alýǵa qatysty daý órship keledi. О́ıtkeni oblys ákimdigi tenderdi ózderimen jumys isteýge yńǵaıly kásipkerlerge ǵana beretin kórinedi.
– Tender oblystyq ákimdikke jaqyn júretin azamattarǵa ǵana berilip jatqany durys emes. Al bul týraly ashyq aıtqandarǵa qatysty qylmystyq is qozǵaý aqylǵa syımaıdy, – deıdi kásipker Rafaıl Hazıpov.
Ras, kásipkerler tarapynan óńir basshylyǵyna shaǵym kóp. Mysaly, Semeıde qatty-turmystyq qaldyqtar polıgonyn salý úshin múldem tıimsiz nesıe rásimdegileri kelgen. Ol úshin 8 mıllıard teńge emes, ózge oblystardaǵydaı eki mıllıon teńgemen-aq jumys isteýge bolar edi dep esepteıdi dóńgelek ústelde bas qosqandar. Radıologııalyq keshenniń qurylysyna áý basta 6,5 mıllıard teńge bólingen edi. Keıin taǵy osyndaı mólsherde qarjy bólgen eken.
Semeıdegi radıologııalyq ortalyqqa dıagnostıkalyq qondyrǵalardy jetkizýge jaýapty kompanııa basshylyǵy da shyqty buqaralyq aqparat qural ókilderine óz pikirin bildirdi. Aıtýlarynsha, sońǵy 6-7 jyldan beri atqarǵan jumystary úshin 2,5 mıllıard teńge qarjylaryn áli ala almaı júr. Sotta da jeńip shyqqan, biraq bálendeı nátıje joq.
– Bar dúnıege ekinshi ret qaıta qarjy bólingen. 6.5 mıllıard teńge. Az aqsha emes. Ne sebepten bólindi? Nelikten osy kúnge deıin jańaǵy nysanda jumys aıaqtalmaǵan? Aqsha qaıda ketti? Bizdiń aqshamyz qaıda? Aıta bersek, suraq óte kóp, – deıdi «Medtehnıka» AQ bas dırektorynyń mindetin atqarýshy Bahtııar Sápıev.
Sonymen qatar ertegi men jyr bolǵan Semeıdegi Jylý energııa ortalyǵynyń qurylysyna qatysty másele de kóterildi. Investısııalyq kelisimshart iri túrik fırmasynyń qolynda bolǵanymen, sot arqyly ol buzylǵan. Al qala turǵyndary qysta qazandyqtan shyqqan býdaq-býdaq qara tútinnen tunshyǵyp jatady. Onyń ústine kóptegen úılerge jylý da jetpeıdi.
– Semeı halqy úshin qazandyq aýadaı qajet. Qysta qar beti qap-qara bolyp jatady. Oń jaǵalaýda ǵana 48 qazandyq bar edi. Búgingi kúnde birazy qysqartyldy. Qazandyqtar eshqandaı súzgisiz jumys isteıdi. Shyǵaryndylar kádimgideı aýaǵa tarap jatyr, – deıdi ınvestor kompanııanyń ókili Oljas Esenǵarın.
Esterińizde bolsa, ótken jyly О́skemendegi bıznesmender tenderge qatysty shaǵym aıtqan-tuǵyn. Bıyl Semeıdegi bir top kásipker oblys ákiminiń jumysyna kóńili tolmaıtyndaryn jetkizdi. Pikir bildirip ǵana qoıǵan joq, memleket basshysynan kómek surap ashyq hat joldady.
Al oblys ákiminiń keńesshisi Ermak Sálimov árbir daýly másele sotta qaralýy kerektigin aıtty.
– Men osy kompanııanyń basshylyǵymen tanyspyn. Burynǵy joba boıynsha olar Semeı qalasynda memlekettik-jekeshilik áriptestikpen bes balabaqsha salýǵa nıet bildirgen. Kelisimshart bar. Biz olarǵa jer berdik. Olardyń quqyq belgileıtin qujattary da joq emes. alaıda, olar jumysqa kirisken joq. Sodan keıingi joba – jylý qazandyǵy edi. Mine, jaýap. Máseleni tek zań boıynsha sheshý kerek. Zań bar, sot bar. Aıǵaı-shý shyǵarǵan durys emes, – deıdi ákimniń keńesshisi E. Sálimov.
Kásipkerlerdiń aıtýynsha, jergilikti bılikke qarsy shyqqan adamdyń bárine qysym kórsetiledi. Sondyqtan kóbi óz pikirlerin ashyq aıtýǵa bata almaıdy. Degenmen, bul jolǵy jıynǵa aýdandaǵy azamattar da onlaın formatta qosylyp, ádiletsiz ótken tenderler týraly búkpesiz aıtty.