Elimizdegi epıdemııalyq ahýal tolyq turaqtala qoıǵan joq. Degenmen «qyzyl aımaqtaǵy» óńirlerdiń qatary azaıǵany qýantady. 9 maýsymdaǵy jaǵdaı boıynsha elimizde bir-aq óńir – Nur-Sultan qalasy «qyzyl aımaqta» qalyp tur.
El óńirlerindegi epıdemııalyq ahýaldy baǵalaý matrısasy boıynsha «qyzyl aımaqta» Nur-Sultan qalasy qaldy. Al «sary aımaqta» Almaty qalasy, Aqmola, Atyraý, Batys Qazaqstan, Qaraǵandy jáne Pavlodar oblystary tur. Qalǵan Shymkent qalasy, Almaty, Aqtóbe, Jambyl, Qostanaı, Qyzylorda, Mańǵystaý, Shyǵys Qazaqstan, Soltústik Qazaqstan jáne Túrkistan oblystary – «jasyl aımaqta».
Qyzaryp turǵan jalǵyz óńir – elordada sońǵy ýaqytta KVI-men syrqattaný tómendegeni baıqalady. Degenmen bul oń kórsetkish áli baıaý bolyp tur. Bul týraly Nur-Sultan qalasynyń bas memlekettik sanıtarlyq dárigeri Sarhat Beısenova baıandady.
– Syrqattanýdyń tómendeý qarqyny baıaý ósip kele jatqanyn jáne sońǵy úsh aptada orta eseppen aptasyna 10%-dan 19%-ǵa deıin tómendegenin atap ótkim keledi. Biraq qazir Sovid-19 indeti boıynsha naqty tirkelgen jaǵdaılar qolaısyz epıdemııalyq jaǵdaıdy kórsetýde jáne qala «qyzyl aımaqta» qala beredi. Kúnine 70-ten 200-ge deıin Sovid-19 juqtyrý jaǵdaıy tirkeledi. Jyl basynan beri elordada syrqattanǵandar sany 38 myńnan asty, pandemııa bastalǵannan beri 57 168 jaǵdaı tirkeldi. Mamyr aıynyń basymen salystyrǵanda 100 myń turǵynǵa shaqqanda aptalyq syrqattaný kórsetkishi 210-nan 110-ǵa deıin tómendedi. Bir aptada Sovid-19 boıynsha 1 315 jaǵdaı tirkeldi, syrqattaný kórsetkishi aldyńǵy aptadan 18%-ǵa tómen (aldyńǵy aptada – 1 617 jaǵdaı), 100 myń turǵynǵa shaqqandaǵy qarqyndy kórsetkish 110,7-ni qurady. Reprodýktıvti sany – 0,88, – deıdi astananyń bas sanıtary.
Sońǵy táýlikte elordada 203 KVI jaǵdaı tirkelgen. Qazir qalada ınfeksııanyń belsendi 1 551 oshaǵy bar. Medısınalyq baqylaýda baılanysta bolǵan 4 116 adam bar.
Ashyq qosymshasymen jumys isteıtin nysandarda joba engizilgen sátten 7 maýsymǵa deıin úı karantınin buzǵan 3 140 adam anyqtaldy, onyń ishinde 1 436 naýqas jáne 1 704 baılanysta bolǵan adam bar. Al 101 kelýshi «qyzyl/sary» mártebesi bola tura mekemege birneshe ret kelgen. S.Beısenovanyń aıtýynsha, koronavırýs ınfeksııasy taralýynyń aldyn alý maqsatynda Densaýlyq saqtaý mınıstrligi KVI-men aýyratyn naýqastar men baılanysta bolǵan adamdar úshin oqshaýlaýdyń mindetti rejimin kózdeıtin sanıtarlyq qaǵıdalardy bekitti. 10 maýsymnan bastap oqshaýlaý rejimin buzǵan turǵyndarǵa 87 510 teńge aıyppul salynady.
«Qyzyl aımaqtaǵy» qalada vaksınalaý qarqyny da kúsheımeı tur. Sońǵy bir aıda bul kórsetkish 46%-ǵa tómendegen eken. Búginde astanada 100-den asa ekpe kabıneti jumys istep tur. 9 maýsymdaǵy jaǵdaı boıynsha qala halqynyń 9,4%-y nemese 111 683 adam eki komponentti vaksınany tolyq aldy. Birinshi komponentpen 169 632 adam nemese 14,3% qamtylǵan. Saýda jáne oıyn-saýyq ortalyqtary, saýda úıleri janyndaǵy ýaqytsha egý pýnktterinde birinshi komponentpen 19 742 adam nemese barlyq egilgen halyqtyń 11,6%-y, ekinshi komponentpen 9 109 adam nemese 8,1%-y vaksına saldyrdy.