Soltústik Qazaqstan oblysy 3 maýsymnan bastap «jasyl aımaqqa» ótken bolatyn. Qazir óńirdegi indettiń taralýy qalypty jaǵdaıda. Oblystyq sanıtarlyq-epıdemıologııalyq baqylaý departamentiniń bastyǵy Áset Jumataevtyń aıtýyna qaraǵanda, syrqattanǵandar sany táýligine 10 shaqty adam tóńireginde.
Jalpy oblysta osy kúnge deıin indet juqtyrǵan 14 918 adam tirkelgen. Sonyń ishinde 443 syrttan kelgen adamdar arasynan shyqqan. Barlyq syrqattyń 9 463-inde aýrý belgileri bolǵan, al 5 455-inde belgi bolmaǵan. Boıynan indet tabylǵan adamdardyń 60 paıyzy medısınalyq kómekke ózderi júgingen adamdar. Qalǵandary syrqattarmen baılanysta bolǵandar arasynan jáne profılaktıkalyq tekserýler kezinde anyqtalǵan. Sońǵy kezderdegi birshama kóp tirkelý jaǵdaıy 6 maýsymda boldy. Bul kúni 13 adamnyń boıynda indet bary anyqtaldy. Sonyń 10-y Petropavl qalasynyń turǵyndary. Al Aıyrtaý, Ǵ.Músirepov jáne M.Jumabaev aýdandarynan bir jaǵdaıdan tirkeldi.
Indetke qarsy vaksına ektirgen adamdar sany da artyp keledi. 7 maýsymdaǵy málimet boıynsha 77 myńnan artyq adam vaksınanyń birinshi, 42 638 adam ekinshi komponentterin ektirdi. Qazir oblysta vaksına jetkilikti dárejede jáne 3 túri bar. Onyń ishinde otandyq vaksına da jetkilikti kólemde jetkizilgen.
Jaǵdaıdyń turaqtalýyna baılanysty birqatar shekteý sharalary da alynyp tastaldy. Máselen, konsert zaldarynda 30 paıyzdyq tolyqtyrýlarmen merekelik sharalar ótkizýge ruqsat etildi. Qoǵamdyq monshalar men saýnalardyń jumysyna shekteý qoıylmaıtyn boldy. Akvaparkter men kompıýter zaldarynyń, saýyqtyrý lagerleriniń jumysyna ruqsat berildi. Degenmen betperdelik rejimnen qutylýǵa áli erte. Barlyq qoǵamdyq uıymdar men dúkenderge betperdesiz kirýge bolmaıdy. Memlekettik kásiporyndarda vaksına ektirý ashyq talap etile bastady. Halyq buǵan túsinistikpen qaraýda.
Soltústik Qazaqstan oblysy