Qaraǵandy qalasyndaǵy «Gornıak» bazarynda 33 jastaǵy er adam kóz jumdy. Úsh kún buryn tártip saqshylary osy jerden áıeldiń máıitin tapqan bolatyn, dep habarlaıdy Egemen.kz.
«Qazirgi ýaqytta osy eki jaǵdaıdyń mán-jaıy anyqtalyp jatyr, sot-medısınalyq saraptama júrgizilýde. Áleýmettik jelilerdegi málimetke sáıkes, 9 maýsym kúni «Gornıak» aıaldamasynda ornalasqan dúkenge kireberiste er adam jazataıym oqıǵa saldarynan qaza tapty. Marqum qaladaǵy fırmalardyń birinde ekspedıtor bolyp qyzmet atqarǵan. Ol áleýmettik pavılonǵa taýar alyp kelgen. Kýágerlerdiń aıtýynsha, dúkennen shyǵaberiste baspaldaq súıenishine qoly tıgen er adamdy toq soqqan. Alaıda, Qaraǵandy ákimdigi bul faktini joqqa shyǵarady. «Áleýmettik jelilerde Maıqudyq shaǵyn aýdanynda elektr toǵynyń soǵýyna baılanysty jas jigittiń qaza bolǵany týraly aqparat taralýda. Qaraǵandy qalasy Polısııa basqarmasynyń málimetinshe, er adamnyń ólimi densaýlyq jaǵdaıyna baılanysty bolǵan. Atalǵan faktige sáıkes, sot-medısınalyq saraptama taǵaıyndaldy. Tergeý amaldary júrgizilýde. Merziminen buryn qorytyndy jasamaýdy jáne tekserilmegen aqparatty taratpaýdy suraımyz. Saraptama qorytyndysy boıynsha sebep anyqtalady», dep habarlady Qaraǵandy qalasy ákimdiginiń baspasóz qyzmetinen.
Oqıǵaǵa qatysty oblystyq Polısııa departamenti de túsinik berdi.
«9 maýsymda polısııaǵa dúkenderdiń birinde er adamnyń máıiti tabylǵany týraly habarlama kelip tústi. Oqıǵa ornyna shyqqan kezde fakti rastaldy: saýda núktesiniń mańynda denesinde zorlyq-zombylyq belgileri joq 33 jastaǵy er adamnyń máıiti tabyldy. Bul fakti polısııada tirkeldi. Sot-medısınalyq saraptama taǵaıyndaldy, onyń nátıjeleri boıynsha is júrgizý sheshimi qabyldanatyn bolady. Polısııa qyzmetkerleri oqıǵanyń mán-jaıyn anyqtap jatyr», dedi Qaraǵandy oblysy PD baspasóz qyzmetinen.
Polısııa aqparatyna súıensek, dál osy jerde úsh kún buryn 36 jastaǵy áıel qaıtys bolǵan. Onyń ólimine densaýlyq jaǵdaıy sebep bolǵany habarlanýda.
«6 maýsymda sol aýdanda denesinde zorlyq-zombylyq belgileri joq 36 jastaǵy áıeldiń máıiti tabyldy. Sot-medısınalyq saraptama onyń óliminiń sebebi júrek aýrýy – «keńeıtilgen kardıomıopatııa» ekenin anyqtady», dedi polısııadan.