Mýltfılmniń atasy qaldyrǵan buıymdar ulttyq kınostýdııa murajaıyn tolyqtyrdy

– Qazaq anımasııasynyń jandanýy men damýy Ámen Qaıdarovtyń esimimen tyǵyz baılanysty. Ámen Áb­janulynyń áriptesteri men shá­kirtteri, sondaı-aq kóptegen jas kınoger ony árqashan úlken qurmetpen, jyly rızashylyqpen eske alady. Otbasylyq muralardy syıǵa tartý – bul tańǵalarlyq ıgi is. Sondyqtan men Ámen Ábjanulynyń otbasyna úlken alǵysymdy bildiremin. Qazaq kınosy murajaıynyń qoryn tolyqtyra alatyn basqa kıno qaıratkerleriniń týys­tary men jaqyndaryna sizdi úlgi etkim keledi. Bizdiń maqsatymyz – ulttyq kınematografqa baılanysty baǵa jetpes muraǵattyq eksponattardy, onyń biregeı tarıhyn saqtaý, – dedi vıse-prezıdent Aıdarhan Ádilbaev.

– Ámen Ábjanulynyń esimin ardaq­taǵandaryńyzǵa myń alǵys! Ol kınostýdııany óte jaqsy kóretin jáne qazaq anımasııasymen baılanysty barlyq dúnıe «Qazaqfılmge» tıesili ekenin jıi aıtatyn, sondyqtan da otbasymyzben onyń zattaryn kınostýdııa janyndaǵy Qazaq kınosy murajaıyna berýge sheshim qabyldadyq. Bul óske­leń ur­paqty tárbıeleý úshin de óte ma­ńyzdy, – dedi nemeresi Danııar Hasanov.

Sondaı-aq murajaıǵa Ámen Ábjan­ulynyń qylqalamynan shyqqan Kárim Qaıdarovtyń (Á.Qaıdarovtyń uly) portreti tapsyryldy.

Kózkórgender 1948 jyly stýdent ke­zinde tanysqan Ámen men Va­len­­­­tına Qaıdarovtardyń mahabbat hıkaıa­­­syna qanyq bolsa kerek. Ult­tyq stýdııaǵa Ámen Ábjanulynyń jubaıy – Valentına Qaıdarovanyń medal­dary men qujattary turaqty saqtaýǵa berildi. Áriptesteri Valentına Kons­tantınovna Ámen Ábjanuly úshin eń úlken mahabbat pen adal dos qana emes, sonymen birge janqııarlyq kómekshi, árıne sosyn mýzasy bolǵanyn eske aldy.

Ámen Qaıdarov Almaty kórkem­sýret ýchılıshesinde, Valentına Kons­tantınovna QazMÝ-diń fılologııa fa­­kýltetinde oqıdy. Olardy Ámen Áb­­janulynyń apasy – Raıhan tanys­tyrady. Úsh jyldan keıin olar otaý quryp, anımator qaıtys bolǵanǵa deıin 60 jyldan astam ýaqyt birge ómir súredi.

ALMATY