«Atameken» Ulttyq kásipkerler palatasy tórtinshi jyl qatarynan qazaqstandyq joǵary oqý oryndarynyń bilim baǵdarlamalaryna reıtıng júrgizip keledi. 2018-2020 jj. aralyǵynda QR Bilim jáne ǵylym mınıstrliginiń tapsyrysymen úsh ret jarııalandy. «Atameken» UKP Tóraǵasynyń orynbasary Oljas Ordabaev MEDIA CLUB QAZAQSTAN platformasynda ótken efırde reıtıng túrli talaptar boıynsha júrgizilýi kerek ekenin aıtty, dep habarlaıdy Egemen.kz.
«Reıtıng oqý orny týraly alǵashqy pikirdi qalyptastyrady. Ol qandaı talaptar boıynsha jasalatyny óte mańyzdy. Biz tórtinshi jyl qatarynan usynyp júrgen reıtıng eki talap boıynsha júrgiziledi. Birinshisi – túlekterdiń jumysqa ornalasýy, ekinshisi – bilim baǵdarlamalarynyń ózektiligi. Iаǵnı stýdent oqyp júrgende kerek daǵdylardy qanshalyqty kóp meńgeretinin, oqý bitirgen soń bir jyl ishinde jumys tabýyna qanshalyqty kómektesetinin zertteıdi. «Atameken» reıtıngi ýnıversıtettiń potensıalyn anyqtamaıdy. Olar ár túrli talaptar boıynsha júrgizilýi kerek. «Atameken» UKP reıtıngi túlekterdiń júmysqa ornalasý deńgeıi boıynsha jasalady»,-deıdi Oljas Ordabaev.
Esterińizge sala keteıik, 2020 jyly «Atameken» UKP júrgizgen zertteý jumysynda 2 myń bilim berý baǵdarlamasy qamtyldy, 68 myń túlektiń jumysqa turýyna taldaý jasaldy. Reıtıng 108 ýnıversıtet boıynsha júrgizildi.
Reıtıng nátıjesi boıynsha elimiz boıynsha úzdik dep tanylǵan alǵashqy 5 ýnıversıtet:
M. S. Nárikbaev atyndaǵy KAZGIýÝ Ýnıversıteti; Qazaqstan-Brıtan ýnıversıteti; KIMEP ýnıversıteti; Halyqaralyq aqparattyq tehnologııalar ýnıversıteti; Qazaqstan-Nemis ýnıversıteti.