Nur-Sultan qalasynyń ákimi Altaı Kólginov Instagram paraqshasynda azamattardy onlaın qabyldaǵanyn málim etti, dep habarlaıdy elorda ákimdiginiń resmı saıty.
«Apta saıyn onlaın formatta azamattardy qabyldap turamyn. Jyl basynan beri 200-den astam otbasy qabyldandy. Qala turǵyndarymen onlaın-kezdesýlerdi turaqty negizde Memleket basshysynyń «Halyq únine qulaq asatyn memleket» tujyrymdamasyna kóshý jónindegi mindetterin iske asyrý aıasynda ótkizemiz.
Azamattardy qabyldaýmen qatar, keri baılanysty nyǵaıtýǵa esep berý kezdesýleri men qala aýdandaryn apta saıyn aralaý kómektesedi. Bul sharalar barynsha kóp turǵyndardy qamtýǵa múmkindik beredi. Aıtylǵan máselelerdi nazarǵa alamyz, qalany turǵyndardyń qatysýymen damytamyz», dep jazdy elorda ákimi.