Osydan eki jyl buryn Qostanaı oblysyna Barsakelmes qoryǵynan birneshe qulan ákelingen edi. Olardyń biri qazir Torǵaıdaǵy «Altyn dala» memlekettik tabıǵı rezervatynyń jabaıy janýarlardy jersindirý ortalyǵynda tur. Janýar býaz bolǵan soń, rezervat mamandary osy jerde baqylap, kútimge alýdy jón kórgen. Sol qulan taıaýda ǵana qulyndady.
Soltústik óńirlerde kezdese bermeıtin tuıaqty janýardyń Torǵaı dalasynda tuńǵysh ret tóldeýin oblys jurtshylyǵy buryn-sońdy bolmaǵan tańǵalarlyq oqıǵa retinde qabyldady.
– Osydan 3-4 jyl buryn oblysqa 9 qulan ákelingen. Olar Torǵaı dalasyna jiberildi. Bir-ekeýi keıin Qaraǵandy oblysyna qaraı aýypty. Birneshe qulannyń moınyna elektrondy belgi bergish chıp salynǵan, olardyń biriniń óleksesi Arqalyqtyń mańaıynan tabyldy. Janýardyń ajaly adamnyń qaskóıliginen keldi me, álde basqa bir sebep boldy ma, ol jaǵy beımálim. Taǵy bireýin brakonerler atyp ketti. Qalǵandarynyń moınynda chıp joq, olardyń qaı mańda júrgenin bilmeımiz ǵoı. Biraq osy ózimizdiń oblystyń aýmaǵynda júrgen bolýy kerek. О́ıtkeni ótkende bir kisiler Amangeldi aýdanynan bir-ekeýin kórdik dedi. Sondyqtan kem degende, 4-5 qulandy jersinip ketti dep joramaldap otyrmyz. Olardyń qulyndaǵandaryn kórgen joqpyz. Mamandar sońǵy ákelingen qulandardyń biriniń býaz ekenin kóktemde baıqaǵan. Odan keıin ádeıi jabaıy janýarlardy jersindirý ortalyǵynda ustap, kútim jasalǵan ǵoı. Negizi qulandy qamaýda kóp ustaýǵa bolmaıdy. Mysaly, alǵash kelgen qulandardy kúzde ákeldi de, bir qystap shyqqan soń, kóktemde erkine jiberdi, – dedi oblystyq orman sharýashylyǵy jáne janýarlar dúnıesi aýmaqtyq ınspeksııasy basshysynyń orynbasary Ǵılymhan Moldaǵulov.
Alǵash kórgen adam bas-qulaǵyna qarap, esektiń qodyǵy ma dep qalatyn, sosyn sıraqtaryna qarap jylqy tóli shyǵar deıtin súp-súıkimdi qulynnyń jaryq dúnıege kelgenine bir apta boldy. Áýeli óte áljýaz kóringenimen, saǵat sanap shıraı bastady. Enesi shaba jónelse, qalyspaıtyn sekildi. Erekshe qulyndy jersindirý ortalyǵynyń mamandary kúndelikti baqylaýǵa alǵan.
Qulandar Qostanaı oblysyna alǵash 2017 jyldan bastap, Ortalyq Qazaqstandaǵy jabaıy janýarlardyń tabıǵı popýlıasııasyn qalpyna keltirý jobasy aıasynda ákeline bastady. Jobany Qazaqstan bıoalýantúrlilikti saqtaý qaýymdastyǵy sheteldik áriptesterimen birlesip júzege asyrýda.