Temirtaý qalasynda on saýsaǵynan óneri tamǵan Evgenıı Bondarenko degen azamat turady. О́zi onlaın-saýda salasynda jumys istegenimen, bos ýaqytynyń basym bóligin tehnıkanyń tilin meńgerýge arnaıdy.
Taıaýda ol Betmen týraly fılm men Krıstofer Nolannyń «Tıomnyı rysar» hıkaıasynan alǵan áseri boıynsha betmobıl qurastyryp shyǵardy. Bul sharýaǵa ol úsh jylǵa jýyq ýaqytyn sarp etken.
Evgenıı mundaı qyzyǵýshylyqtyń bala kezinen shym-shytyryqqa toly fantastıkalyq fılmder men komıksterdi jaqsy kórgeninen bastalǵanyn aıtady.
– Men qııalymdaǵy betmobıldiń jobasyn aldymen úıdegi edenge saldym. Sodan keıin baryp ony is júzinde jasap shyǵarýdyń joldaryn oılastyrdym. Betmobıldi qurastyrýdy «Ford» júk kóliginiń artqy beldigin paıdalanýdan bastadym. Sodan keıin basqa kólikterdiń qosalqy bólshekterin qoldana bastadym, – deıdi sheber.
Negizinde, Bondarenkonyń betmobıli áli tolyq jasalyp bitken joq. Soǵan qaramastan ol qazirdiń ózinde júrýge jaramdy. Endi joba avtory týyndysyn test-draıv synaǵynan ótkizbekshi.
Betmobıl jasalyp bitkennen keıin Evgenıı óziniń kórgen jandy eleń etkizetin erekshe kóligimen kórmelerge qatysýdy oılastyryp júr. Jarnama jasaýǵa paıdalaný da josparda bar.
Aldaǵy ýaqytta temirtaýlyq sheber jol talǵamaıtyn kólik qurastyrýdy qolǵa alǵysy keletinin aıtady.
Qaraǵandy oblysy,
Temirtaý qalasy