Parlament Májilisiniń depýtaty, Nur Otan partııasy fraksııasynyń múshesi, Qazaqstan Ardagerleri qaýymdastyǵynyń tóraǵasy Baqytbek Smaǵul Saǵadat Nurmaǵambetov atyndaǵy sport klýbyna baryp, jattyqtyrýshylar men sportshylardy úlken jetistikterimen quttyqtady.
13 maýsymda Almatyda ótken grepplıng boıynsha kásipqoılar arasynda Arlan «Grip PRO 8» týrnırinde atalǵan klýbtyń úsh ókili, atap aıtqanda jattyqtyrýshylar Nursultan Orynbasarov, Samat Aıtpanbet jáne Dıas Qanaıbekov jeńimpaz atandy.
Depýtat «Sagadat batyr – QTT» klýbynyń osy jyldardaǵy jetistikterin erekshe atap ótip, sáttilik tiledi. Ol klýbtyń jattyqtyrýshylary men tárbıelenýshileri túrli týrnır ótkizetinin, qaıyrymdylyq aksııalary men qoǵamdyq jumystarǵa qatysatynyn, kóptegen bedeldi jarysta jeńiske jetetinin, shetelde el namysyn laıyqty qorǵap, halyq qaharmany, Qazaqstannyń birinshi Qorǵanys mınıstri Saǵadat Nurmaǵambetovtyń esimin belsendi nasıhattaıtynyn atap ótti.
«Búginde «Sagadat batyr – QTT» klýby ártúrli jastaǵy 200-den astam sportshyny tárbıelep otyr. Olardyń kópshiligi halyqaralyq týrnırlerde maqtanyshpen óner kórsetti. Sizder Saǵadat Nurmaǵambetov, Qasym Qaısenov, Baýyrjan Momyshuly syndy batyrlardyń, sondaı-aq myqty balýan Qajymuqan Muńaıtpasovtyń laıyqty urpaǵysyzdar. Sizder jarystarda abyroımen óner kórsetip, halyqaralyq arenada eldiń namysyn qorǵaý óz mindetińiz dep sanaısyz. Alda kóptegen túrli synaqtar bar, biraq sizder laıyqty túrde jeńiske jete alasyzdar dep oılaımyn. Elimizdiń damýy men gúldenýine úlken úles qosyp, bizdiń alǵashqy qorǵanys mınıstrimiz Saǵadat Nurmaǵambetovtyń esimin nasıhattap júrsizder. О́skeleń urpaqqa laıyqty úlgi kórsetesizder dep senemiz. Jastar – bizdiń bolashaǵymyz», dedi depýtat óziniń quttyqtaý sózinde.
Odan keıin Baqytbek Smaǵul klýbtyń bas bapkeri Nursultan Orynbasarovqa Alǵys hat pen Baýyrjan Momyshuly atyndaǵy «Namys» medalin tabys etti. Ol jarysqa qatysqan barlyq jattyqtyrýshylar Samat Aıtpanbet, Eljan Jumadil, Nurtýǵan Bekmuratov, Dıas Qanaıbekov eki dúrkin álem chempıony Jibek Qulymbetova, sportshylar Azamat Ábdıev, Maqsat Muratulyna úlken tabystar tiledi.
Sondaı-aq «Aýǵan» soǵysynyń ardageri, 3-dárejeli «Aıbyn» ordeniniń kavaleri, dintanýshy Aldajar Seıituly balalarǵa sáttilik tiledi. О́z kezeginde Nursultan Orynbasarov olarǵa kórsetilgen senim men nazar úshin alǵys aıtyp, el ıgiligi úshin odan ári damyp, jumys isteıtinin málimdedi.
«Bul meniń ǵana emes, búkil komandamnyń eńbegi. Shákirtterime, sondaı-aq klýbymyzdyń prezıdenti Erbolat Saparulyna kórsetken qoldaýy úshin úlken alǵysymdy bildirgim keledi. Barshańyzdy osy marapatpen quttyqtaımyn», dedi ol.
«Arlan Grip PRO 8» týrnırinde Nursultan Orynbasarov reseılik Magommed Kabardıevti jeńdi. Bul – qazaqstandyq sportshynyń bes jyldan keıingi alǵashqy týrnıri boldy. Sońǵy ret ol Qyrǵyzstannyń Osh qalasynda sharshy alańǵa shyqqan bolatyn.
«Men bes jyl boıy óner kórsetpegendikten, qıyn boldy. Bul uzaq merzim. Meniń qarsylasym ýshý-sanda boıynsha Reseıdiń eki dúrkin chempıony, MMA boıynsha álem chempıony boldy. Sondyqtan men bul kúreske muqııat daıyndaldym. Salmaq qýdym. Jaqynda djıý-djıtsýdyń qara belbeýin aldym, bul meni jigerlendirgeni anyq. Bir jaǵynan, bul úlken jaýapkershilik jáne men bizdiń jattyqtyrýshymyz Adam Fokstyń úmitin aqtap, nátıjesinde jeńiske jettim. О́te qýanyshtymyn. Maǵan laıyqty qarsylyq kórsetken qarsylasyma alǵys aıtamyn. Bul da jaqsy tájirıbe», dep óz áserimen bólisti N. Orynbasarov.
Ol bul jeńistiń tek bastamasy ǵana ekenin jáne bolashaqta óz oqýshylarymen birge úlken jarystarda óner kórsetýge nıetti ekenin jetkizdi.
Sonymen qatar «Sagadat batyr-QTT» klýbynyń taǵy eki jattyqtyrýshysy Samat Aıtpanbet Baýyrjan Alymbaevtan basym tússe, Dıas Qanabeıbekov Shamıl Balaevty jeńdi.
Aıta keteıik, klýbtyń Almaty oblysy men Almaty qalasyndaǵy Qazaqfılm shaǵyn aýdanynda eki zaly bar.