BQO-da polıseıler aýdarylǵan kólikten úsh adamdy qutqaryp úlgerdi, dep habarlaıdy Egemen.kz Polisia.kz saıtyna silteme jasap.
Jelaev aýylyna jaqyn jerdegi jol boıynda avtokólik aýdarylyp, jol-kólik oqıǵasy oryn aldy. Patrýldik avtomashınamen sol jerden ótip bara jatqan BQO PD patrýldik polısııa batalony komandıriniń orynbasary Arman Sarabalınov pen qyzmet ınspektory Aleksandr Kalınıchev kólik apaty bolǵan jerge dereý baryp, kóliktiń júrgizýshisi men eki jolaýshysyn kólikten shyǵaryp úlgergen.
Eki sekýndtan keıin avtokólik jaryldy. Tártip saqshylary kez kelgen sátte kólik jarylyp, ózderiniń de zardap shegýi múmkin ekenine qaramastan, adamdardyń ómirin saqtap qaldy.
– BQO PD patrýldik polısııa batalonynyń ekıpajy qala syrtyndaǵy trassalarda táýlik boıy qyzmet etedi. 15 maýsymda shamamen saǵat 04.00-de qyzmet barysynda Chkalov kóshesiniń boıynda LADA Kalina markaly kólik aýdarylǵan. Sol jerde júrgen patrýldik polısııa qyzmetkerleri oqıǵa ornyna jetip, ondaǵy adamdardy shyǵaryp úlgergen. Sanaýly sekýnd ishinde kólik jarylyp, órtenip ketti. Batyldyq tanytyp, adamdardy ólimnen arashalaý úshin táýekelge bel býǵan polısııa qyzmetkerleriniń bul áreketi erlikpen teń, – dedi BQO PD resmı ókili Bolatbek Belgibekov.