Qaraǵandy oblysynda balalardyń jazǵy demalysyn joǵary deńgeıde uıymdastyrý qolǵa alynbaq. Qazirgi pandemııa jaǵdaıynda bul, árıne, ońaı sharýa emes. Ásirese, demalys kezindegi qaýipsizdik máselelerine basa mán beriledi.
Oblystyq bilim basqarmasynyń josparyna saı, qazirgi qolaıly sanıtarlyq-epıdemııalyq jaǵdaıdaǵy kanıkýl ýaqytynda qala syrtyndaǵy 11 lager men 102 shatyrly jáne kıiz úıli balalar lageri jumys isteıdi. Atalǵan demalys oryndary 190 myńnan asa oqýshyny qabyldaýǵa ázir eken. Olardyń basym bóligi áleýmettik az qamtylǵan otbasylarynyń balalary bolmaq.
О́ńirlik kommýnıkasııalar qyzmetinde ótken brıfıngte oblystyq bilim basqarmasynyń basshysy Gúlsim Qojahmetova osyndaı josparymen bólisip, jazǵy ýaqytta oqýshylardyń paıdaly jáne qaýipsiz bos ýaqytyn uıymdastyrý týraly aıtyp berdi. Sondaı-aq ol muǵalimi shomylý maýsymy kezinde balalardyń qaýipsizdigin qamtamasyz etý úshin bilim basqarmasy «Qaýipsiz jaz» aksııasyn, «Jas qutqarýshy» oblystyq jáne óńirlik jarystaryn ótkizetinin atap ótti.
– Balalar men pedagogter sýǵa batqan kezde alǵashqy medısınalyq kómek kórsetýdi úırenedi, jadynamalar men býkletter taratýǵa bastamashylyq jasaıdy. Mektep basshylyǵy oqýshylardy júzýge úıretý boıynsha basseındermen memorandýmdarǵa qol qoıady. Sonymen qatar jergilikti atqarýshy organdar qańqaly basseınderdi satyp alý boıynsha jumystar júrgizýde, – dedi G.Qojahmetova.
Buǵan qosa jazǵy kanıkýl kezinde «Qaýipsiz attraksıon», «Qaýipsiz lager», «Qaýipsiz alań» aksııalaryn uıymdastyrý da josparda bar eken. Mundaǵy basty maqsat – ata-analardy ashyq otty, elektr quraldaryn, gaz jabdyqtaryn paıdalaný erejeleri, sonymen birge sýda júzý jáne jolda júrý erejeleri týraly balalarmen áńgimelesýge shaqyrý. Balalarǵa shuǵyl qyzmetterdiń 112, 101, 102, 103 nómirlerin úıretý kerek.
Al atalǵan brıfıngke qatysqan Qaraǵandy oblysy TJD basshysynyń mindetin atqarýshy Aqylbek Ahmetjanov jazǵy kanıkýl kezinde vedomstvoǵa qarasty bólimshelerdiń joǵary daıyndyq rejimine kóshirilgenin málimdedi. Qutqarýshylar sý aıdyndarynda reıdter júrgizip, demalýshylarǵa jadynamalar taratylatynyn aıtty.
– Búginge deıin olar jabdyqtalmaǵan sý aıdyndaryna 174 tyıym salý belgisi ornatyldy. Bizdiń bastamamyz boıynsha 2GIS júıesinde shomylýǵa bolatyn sý aıdyndary men demalys aımaqtary arnaıy belgilermen belgilendi, – dedi A.Ahmetjanov.
Oblystyq TJD basshysynyń mindetin atqarýshy óńirdegi Fedorov, Samarqand, Sherýbaı-Nura, Keńgir sýqoımalarynyń jaǵalaýlarynda, sondaı-aq Balqash jáne Aınakól kólderinde táýlik boıy jeti qutqarý bólimshesiniń jumys isteıtinin habarlady. Mundaǵy qyzmetkerler qajetti avtokólik tehnıkasymen jáne júzý quraldarymen jetkilikti mólsherde jabdyqtalǵan eken.
Budan bólek, tótenshe jaǵdaılar departamentiniń qyzmetkerleri júzden asa qoǵamdyq qutqarýshyny oqytyp-úıretý jumystaryn uıymdastyrǵan. Olar oblystyń sý aıdyndarynda qaýipsizdik is-sharalaryn júzege asyrý jumystaryna tartylady.
QARAǴANDY