О́ńir «sary aımaqtyń» sanatyna kirgenimen, jomart jandar qamqorlyqty qajet etetin adamdarǵa qol ushyn sozyp, qoltyǵynan demeýdi toqtatqan joq. Jer-jerde jasalyp jatqan izgilikti sharýany estigende kóńiliń gúldep, janyńnyń jadyrap qalatyny bar.
Aldymen «Júrek jylýy» aksııasynyń keńinen qoldaý taýyp, kóńili darqan, qoly ashyq adamdardyń basyn biriktirip, jaqsylyq jasaýǵa uıytqy bolǵanyn aıta ketken lázim. Azyq-túlik baǵasy qymbattap, eldi abyrjytyp otyrsa da, kóp qamyn oılaǵan azamattar qolda barymen bólisip, birin-biri demeýde. Osy bir jaqsy joralǵy birlikti nyǵaıta túsýde. Birlik bar jerde qandaı qıyndyqty bolsyn eldiń eńserip shyǵatynyna senim mol.
Zerendi aýdanynda eriktiler shama-sharqynsha qarajat jınap, jalǵyzilikti 70 zeınetkerge azyq-túlik sebetterin taratty. Árıne qara sýǵa qamalyp otyrmaǵanymen, jerlesteriniń ózderin elep-eskerip, sálem berip kelgenine qarttar jaǵy kádimgideı qýanyp qaldy. О́zgege úlgi bolar ónegeli is aýdanda áli de jalǵasýda.
«Meıirim» qorynyń da jaqsylyq jasaýdan jarysqa túskendeı keńpeıildilik kórsetýi jarasymdy. Qorǵa jınalǵan qarajatqa olar eki otbasynyń qysqy otyn-kómirin satyp alyp berdi. Áleýmettik jaǵynan az qamtylǵan on shaqty otbasyna qarjylaı kómek kórsetti. Osy oraıda aýdanda qolǵa alynǵan «Muqtaj jandarǵa syılyq» qaıyrymdylyq aksııasy týraly bóle-jara aıta ketýge bolady. Eriktiler aksııa aıasynda ondaǵan otbasynda bolyp, materıaldyq kómek kórsetti.
Jaqsy is óńirdiń ózge aýdandarynda da keńinen óristeýde. Aıtalyq, Qorǵaljyn aýdanynyń eriktileri áleýmettik jaǵynan az qamtylǵan adamdarmen birge múmkindigi shekteýli jandardy da nazardan tys qaldyrmaı, kómek kórsetýde. Taıaýda olar estý qabileti tómen bir adamǵa quny 500 myń teńge turatyn apparat satyp alyp, syıǵa tartty. Sandyqtaý aýdanyndaǵy Birlik selolyq okrýginde de qaıyrymdylyqtyń qanat jaıyp turǵany ózgege jaqsy mysal. Osyndaǵy «Balkashın» seriktestiginiń quryltaıshysy Atlan Dokaev jalpy quny 1 mln 720 myń teńge turatyn 215 qap undy turǵyndarǵa tegin taratyp berip, alǵys arqalaǵan jaıy bar.
El ishindegi birlikti nyǵaıtýǵa septesetin «Biz birgemiz» aksııasy aıasynda da qanshama qaıyrymdylyq sharasy qolǵa alynýda. Bul arada bir ǵana mysal keltire ketelik, Stepnogorsk qalasyndaǵy «Dáriger plus» medısına ortalyǵy oblystyq máslıhat depýtattarymen birlese otyryp, múmkindigi shekteýli balalaryn baǵyp otyrǵan otbasylardy júrek jylýymen jadyratty. Olarǵa tátti taǵamdarmen birge azyq-túlik te taratyldy. 8 otbasyna 80 myń teńge kóleminde kómek kórsetildi.
Jer-jerdegi júrek jylýymen bólisetin qaıyrymdy adamdardyń qareketi barsha qaýymnyń kóńilin demdep, keler kúnderge degen úmit otyn laýlatyp otyr.
Aqmola oblysy