Qazaqstandyqtar jańa kólikterdi belsendi túrde satyp ala bastaǵan. Arnaıy resmı derekter osyny rastaıdy. Statıstıkaǵa súıener bolsaq, mamyr aıynda satylǵan jańa avtokólikter sany osymen ekinshi aı qatarynan 10 myń birlikten asyp túsken.
Qazaqstan avtobıznes qaýymdastyǵynyń deregi boıynsha otandyq dılerler mamyr aıynda 9402 jeńil avtokólik pen kommersııalyq tehnıka satqan. Sonymen qatar 695 júk kóligi, arnaıy tehnıkalar men avtobýstar satylǵan. Bul – 2020 jyldyń mamyr aıymen salystyrǵanda 39,2 paıyzǵa kóp.
Jalpy jyl basynan beri el turǵyndary 44 369 jańa avtokólik, avtobýs jáne júk kólikterin taqymǵa basqan. Bulardyń jıyntyq ósimi byltyrmen salystyrar bolsaq, 68,8 paıyzǵa joǵary. Qaýymdastyq sarapshylarynyń aıtýynsha, qatań lokdaýn men karantın shekteýleriniń bolmaýy avtokólik satylymyna serpin berip otyr. Alaıda jazdyń sońǵy aılarynda jaǵdaı basqasha, ıaǵnı satylym deńgeıi tómendeýi de yqtımal.
О́tken aıda eń kóp satylǵan kólikterdiń ondyǵyna qandaı markalar kirgenin jiktesek, birinshi orynda – Chevrolet. Mamyr aıynda bul markanyń 2791 danasy satylsa, Hyundai-dyń 1644 danasy tutynýshylar qolyna jetken. Úshtikti 1398 dana satylymmen Toyota túıindeıdi. Odan keıingi orynda Kia (1030 dana) men Lada (702 dana) tur. Sonymen birge Volkswagen (465), Renault (310), Nissan (274) jáne Lexus (149) markalaryna qyzyǵýshylyq tanytýshylar da artyp keledi. Ondyqty 135 dana satylymmen qytaılyq JAC markasy qorytyndylap tur.
Qaýymdastyq mamyr aıynda qazaqstandyqtardyń yqylasyna erekshe bólengen kólik modelderi týraly da aqparattardy jarııa etken. Oǵan súıensek, alǵashqy úshtikte Chevrolet Nexia (1522), Chevrolet Cobalt (1015) jáne Hyundai Accent (747) bar. Bul kólikterdiń jeńildetilgen jáne qarapaıym nesıeleý baǵdarlamalary arqyly berilýi de kólik satylymyn arttyra túsýge septigin tıgizgeni anyq. Eń kóp saýdaǵa shyǵarylǵan modelder ondyǵynda Kia Rio (617), Toyota Camry (584), Toyota RAV4 (425), Volkswagen Polo (362), Hyundai Santa Fe (304), Hyundai Creta (295), Lada Largus ta (285) bar.
Jaqyn arada elimizde taǵy bir model tanymaldylyqqa ıe bolýy múmkin. Bıyl 25 mamyrdan bastap elimizde jańa Chevrolet Equinox krossoveriniń satylymy bastaldy. Jańa model Qostanaı qalasyndaǵy «SaryarqaAvtoPromda» qurastyrylmaq. Chevrolet Equinox otandyq naryqta úsh túspen – aq, qara jáne sur túste usynylmaq. Baǵasy – 13 mln 490 myń teńge. Joǵarydaǵy reıtıngtiń ózi aıtyp turǵandaı sońǵy jyldary el arasynda Chevrolet markasynyń tanymaldylyǵy eselep artty. Osy kúnge deıin Chevrolet pen Ravon-nyń 19 045 danasy qurastyrylǵan.
Sońǵy bes jylda jalpy somasy 140 mlrd teńgege 27 myń avtokólik jeńildetilgen nesıe arqyly satylypty.