Ortalyq kommýnıkasııalar qyzmetindegi baspasóz máslıhatynda Pavlodar oblysynyń ákimi «Ertis» fýtbol klýbyna qatysty saýalǵa jaýap berdi, dep habarlaıdy Egemen.kz.
«Ertis» aınalasyndaǵy jaǵdaı – tragedııa jáne pavlodarlyq retinde meniń de ýaıymym. Klýbtyń tarıhy baı. Degenmen, byltyrǵy qarjylyq qıyndyqtar onyń chempıonatty jalǵastyrýyna múmkindik bermedi. Qazirgi kezde klýbtyń qaryzdarynan qutylýdyń uzaq prosessi júrip jatyr», dedi Ábilqaıyr Sqaqov.
Oblys ákimi «Ertisten» bólek oblysta eki kásipqoı fýtbol klýby – «Aqsý» men «Ekibastuzdyń» baryn eske saldy. Ábilqaıyr Sqaqov «Aqsýdyń» bıylǵy Birinshi lıgada sátti óner kórsetip jatqanyn aıtyp, onda tolyǵymen jergilikti fýtbolshylardyń óner kórsetip jatqanyn atap ótti.
«Odan bólek, oblysta áýesqoı jáne kásipqoı fýtbol birge damyp keledi. Fýtboldy damytýdyń arnaıy tujyrymdamasy qabyldanyp, ol turǵyndarmen kelisildi. Qazirgi kezde aýla, aýdan men qalalar arasynda kóptegen jarystar ótýde. Sondyqtan Pavlodarda fýtbol ólgen joq, onyń pozısııalary myǵym, ol jaqsy damyǵan», dedi Ábilqaıyr Sqaqov.