Parlament Senatynyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetine múshe depýtattar Búkilqytaılyq Halyq ókilderi jınalysynyń Aýyl sharýashylyǵy jónindegi komıssııa múshelerimen onlaın kezdesti, dep habarlady Qazaqstan Senatynyń baspasóz qyzmeti.
Senattaǵy salalyq komıtettiń tóraǵasy Álı Bektaev kezdesýdi asha kelip, Qazaqstan Respýblıkasy men Qytaı Halyq Respýblıkasy arasynda saıası, ekonomıkalyq jáne mádenı tyǵyz yntymaqtastyq júzege asyp kele jatqanyn atap ótti. «Eki eldiń zań shyǵarýshy organdary arasyndaǵy turaqty baılanystar dostyq qatynastardy nyǵaıtýda erekshe ról atqarady, bul parlamentaralyq yntymaqtastyqty damytýǵa, zań shyǵarý qyzmetinde tájirıbe almasýdy tereńdetýge ózara múddeliliktiń joǵary ekendigin kórsetedi», dedi Álı Bektaev.
Depýtat Aqylbek Kúrishbaev óz kezeginde qytaılyq áriptesterine О́ńirlerdi damytýdyń 2020-2025 jyldarǵa arnalǵan memlekettik baǵdarlamasy aıasynda júzege asyp jatqan aýyldyq aýmaqtardy damytý jónindegi Qazaqstannyń esebi týraly aıtyp berdi. Ol sondaı-aq aýyl turǵyndary úshin arnaıy «Eńbek» baǵdarlamasy bar ekeni, onda kásipkerlik negizderine tegin oqýǵa bolatyny, sondaı-aq óz bıznesi úshin granttar men mıkrokredıtter ala alatyny týraly habardar etti.
Senator Dúısenǵazy Mýsın aýyl sharýashylyǵynyń damýy týraly sóz qozǵady. Ol aýyldyq jerlerde halyqtyń shamamen 42%-y turatynyn atap ótti. «Agroónerkásip keshenin damytýdyń 2021 jylǵa deıingi memlekettik baǵdarlamasynyń negizgi maqsaty AО́K-tegi eńbek ónimdiligi men óńdelgen aýyl sharýashylyǵy ónimderiniń eksportyn 5 jyl ishinde keminde 2,5 esege arttyrý bolyp tabylady», dedi Dúısenǵazy Mýsın.
Búkilqytaılyq Halyq О́kilderi jınalysynyń depýtattary óz kezeginde kórshi eldegi aýyldy damytý jáne kedeılikti joıý jóninde júrgizilip jatqan jumystar týraly aıtyp berdi. Á.Bektaev kezdesýdi qorytyndylaı kelip, COVID-19 pandemııasynyń ekonomıkalyq zardaptaryna, sondaı-aq álemdik ekonomıkadaǵy quldyraýǵa qaramastan, bizdiń memleketterimiz jumyspen qamtýdaǵy turaqtylyq pen halyqtyń ál-aýqatyn qamtamasyz etý jóninde qabyldap jatqan sharalar jáne basqa da qoldaý kórsetý isteri aýyl turǵyndarynyń ómir súrý sapasyn arttyrýǵa múmkindik beretinin atap ótti.