Mahambet atyndaǵy akademııalyq qazaq drama teatrynyń ujymy kórermenderin ónerimen tánti etip keledi. Budan buryn atalǵan óner ujymy janynan jastar teatry ashylǵan edi. Al bıyl qýyrshaq teatrynyń alǵashqy premerasy sátti ótti.
Jastardyń óner ordasyn oblystyq drama teatrynyń ártisteri Gúlnur Qaıyrlıeva men Ámirjan Nurlanuly qurǵan edi. Olar trýppa múshelerin stýdentter men joǵary synyp oqýshylarynyń arasynan tańdady. Jas býynnyń tarapynan ónerge bet burýǵa nıet bildirýshiler az bolmady.
– Kastıng kezinde akterlik ónerge beıim jastardyń kóp ekenin baıqadyq. Alǵashqy spektakldi Jaıyq jaǵalaýynda, qalalyq saıabaqtarda qoıdyq. Búgingi jastardyń kóńilinen shyǵatyn, aýdıtorııasyna laıyq taqyryptardy repertýarǵa engizýge tyrystyq, – deıdi teatr jetekshisi Á.Nurlanuly.
Jaqynda jastardyń óner ujymy Kerch qalasynda turaqty ótetin «Bosporskıe agony» halyqaralyq teatr festıvaline attanǵan edi. Bul festıvalge atyraýlyq jastar aǵylshyn jazýshysy Bernard Shoýdyń «Sezar jáne Kleopatra» pesasynyń jelisimen «Kleopatra» dramasynyń premerasyn usyndy. Bas rejısseri – Muqanǵalı Tomanov.
– Bul – karantın kezindegi alǵashqy gastrol. Spektakl premerasy ózge eldiń sahnasynda alǵash ret usynyldy, – deıdi teatr dırektorynyń orynbasary Nurgúl Qumarqyzy.
Onyń aıtýynsha, Kerchte «Bosporskıe agony» festıvali 1999 jyldan beri ótkizilip keledi. Bul festıvalde ejelgi ónerdi qazirgi eýropalyq mádenıettiń negizi retinde tanymal etý kózdelgen. Atyraýlyq akterler atalǵan festıvalge 2017 jyly «Medeıa» spektaklimen qatysqan edi. Sol kezde teatr ujymy «Ejelgi taqyrypty zamanaýı oqý» atalymyna ıe boldy.
Al bıyl HHIII ret ótken halyqaralyq festıvalde 11 teatr baq synady. Solardyń arasynan atyraýlyq jastar teatry eki júldeni ıelendi. Festıvaldiń bas júldesi – «Úzdik spektakl» atalymy munaıly óńirdiń jas órenderi usynǵan «Kleopatra» qoıylymyna berildi. Sondaı-aq Kleopatrany somdaǵan atyraýlyq jas akter Ǵaını Kýkatova «Eń úzdik áıel róli» atalymyn ıelendi.
О́nerge degen qyzyǵýshylyq jastar teatrynyń ártisterin osyndaı tabysqa keneltti.