Búgin óńirlik kommýnıkasııalar qyzmetiniń alańynda Jambyl oblysy, T.Rysqulov aýdanynyń ákimi Erbolat Sadyrqulov brıfıng berip, bıyl 10 aýyl gazdanyp, 3 aýylǵa sý tolyq tartylatynyn aıtty, dep habarlaıdy Egemen.kz.
Ákimniń aıtýynsha, aýdanda 42 eldimeken bar. Onyń ishinde ótken jyly 26 aýylda ortalyqtandyrylǵan aýyz sý júıesi bolǵan. Al, aýyz sý júıesi joq 16 eldi mekenniń Ábjapar, Jarlysý, Báıteli, Tassholaq sııaqty eldimekenderine ótken jyly jańa aýyz sý júıesi júrgizilip, paıdalanýǵa berilgen. Sonda qazir aýdanda 30 eldimekende bul másele oń sheshimin tapqan.
«Aýyz sý júıesi eskirgen 9 eldimekenniń 3-eýine, ıaǵnı Qumaryq, Qarakemer jáne Alǵabasqa byltyr jańadan aýyz sý júıesiniń qurylysy bastaldy. Joba 2021 jylǵa ótpeli, ıaǵnı bıyl paıdalanýǵa beremiz. Al, aýdandaǵy 42 eldimekenniń 24-ine tolyq gaz tartylǵan. Bıyl gaz kirmegen 18 aýyldyń ishindegi 10 aýylǵa gaz tartý jumystary júrgiziletin bolady. Sholaq-Qaıyńdy aýylynyń jobasy memlekettik saraptamada. Osy jumystardyń nátıjesinde gazdandyrý máselesi aýdan kóleminde 100 paıyzǵa sheshiledi», dedi Erbolat Sadyrqulov. Aýdan ákimi qalǵan 7 eldimekenniń de máselesin aıtyp ótti. Atap aıtqanda, Mamyrtóbe, Aqqaınar, Toıqudyq, Sumqaıty jáne Qosapan aýyldary men Qumaryq razezi, Qoraǵaty stansııasy halyq sanynyń tıisti normadan az, ıaǵnı 50 adamnan tómen bolýyna baılanysty ekonomıkalyq turǵyda tıimsiz dep tanylǵanyn jetkizdi.
Ákim jyl bastalǵaly 5 aıda aýdan ekonomıkasynyń ósimi 101,5 paıyzdy qurap, ótken jylmen salystyrǵanda 1,5 paıyzǵa óskenin de aıtty. Jyl sońyna deıin bul ósim 104 paıyzǵa deıin josparlanǵan. Aýdan bıýdjeti kirisiniń jyldyq jospary 18,6 mıllıard teńgeni qurasa, onyń ishinde 5 aıdyń jospary 6,4 mıllıard teńge bolǵan. Naqty 6,9 mıllıard teńgeni qurap, 500 mıllıon teńgege artyǵymen oryndalǵan. Al, aýyl sharýashylyǵy salasyndaǵy jalpy óndirilgen ónim kólemi 4,9 mıllıard teńgeni qurap, 2020 jylmen salystyrǵanda 200 mıllıon teńgege artqan. Sonymen qatar, jalpy aýdanda 146,6 myń gektar egistik jer tolyq ıgerilgen. Onyń ishinde basym bóligine, ıaǵnı 61,3 myń gektaryna kúzdik bıdaı, 58,7 myń gektaryna jazdyq arpa sebilgen. Aýdannyń jalpy jer kólemi 908 myń 691 gektar. Onyń ishinde aýyl sharýashylyǵy maqsatyndaǵy jerdiń úlesi 740 676 gektardy quraıdy. Sondaı-aq, aýdan ákimi búginde aýdanda turǵyn úı kezeginde barlyǵy 1145 adam tirkelgenin, turǵyndardy kezeń-kezeńimen turǵyn úımen qamtamasyz etý maqsatynda «Nurly jer» memlekettik baǵdarlamasy aıasynda Qulan aýyly «Araı» turǵyn alqabynan 80 páterlik 5 qabatty 2 úıdiń qurylysy júrgizilip jatqanyn da aıtty. «Birinshi úıdiń qurylys jumystary byltyr bastalǵan, bıyl paıdalanýǵa beriledi. Ekinshi úıdiń qurylysy bıyl bastaldy. Qalǵan eki kópqabatty úıdiń qurylysy jobamen 2023-2024 jyldary berilmek», dedi Erbolat Sadyrqulov.