«MuzVac - úzdik mýzykalyq vaksına!» ataýymen ótken «Astana keshteri» H Halyqaralyq óner festıvali úlken gala-konsertpen aıaqtaldy. Bul aýqymdy is-shara halyq densaýlyǵyn qorǵap, koronavırýspen kúreste aldyńǵy shepten kóringen medısına qyzmetkerlerine shynaıy alǵys aıtý maqsatynda uıymdastyryldy, dep habarlaıdy Egemen.kz.
Nur-Sultan qalasy emhanalarynyń qyzmetkerleri konserttiń basty qonaqtary bolyp, álemge belgili ártisterdiń ónerin tegin tamashalaı aldy. Festıvaldiń uıymdastyrýshylary olarǵa kómek retinde MuzVac dep atalatyn ózderiniń jańa mýzykalyq vaksınasyn oılap tapty. Bul – vırýsty jeńý úshin ımmýnıtetti nyǵaıtýdyń, kóterińki kóńil-kúı syılaýdyń tıimdi quraly. Mýzykalyq vaksınanyń quramyna sahna maıtalmandary shyrqaǵan klassıkalyq ónerdiń jaýharlary endi.
Kórermen qaýym bul keshte Italııa men Shvesııanyń tanymal juldyzdary – Antonello Karossa, Rıkkardo Bertossını, Mıa Stegmar - Djennı Tarnebergtiń ónerin tamashalady. Buǵan qosa, ózderiniń oryndaýshylyq sheberligin belgili otandyq ártister Erlan Rysqalı men Alfııa Karımova, «Astana Opera» teatrynyń sımfonııalyq orkestri men Nur-Sultan qalasy Fılarmonııasynyń kameralyq hory pash etti. Dırıjerlik tuǵyrdy Italııadan kelgen maestro, álemniń úzdik orkestrlerimen jumys istegen Roberto Molınellı basqardy. Dırıjer óz sózinde pandemııa kezinde qaısarlyq tanyqtan dárigerlerge alǵysyn bildirip, festıvaldiń izgi maqsattaryn bólisý úshin bul is-sharaǵa barlyq ártisterdiń zor qýanyshpen kelgenderin jetkizdi.
Konserttik baǵdarlama álemdegi san myń tyńdarmanǵa jaǵymdy áser syılaǵan HH ǵasyrdyń úzdik týyndylarynan quryldy. Atap aıtqanda, «AVVA» jáne «Queen» toptarynyń ataqty ánderi, «Professıonal», «Zulym, jaman, jaqsy», «Mıssııa» syndy áıgili kınofılmderge jazylǵan Ennıo Morrıkoneniń mýzykasy. Tipti arnaıy osy konsert úshin ıtalıandyq kompozıtor Ennıo Morrıkoneniń uly óziniń beınequttyqtaýyn joldady. Ol óz ónerimen adamdardyń jan dúnıesin saýyqtyrýǵa jáne jaqsylyq jasaýǵa umtylǵan Morrıkoneniń mýzykasy «Degdar» qorynyń qaıyrymdylyq qyzmetimen úndes ekenin atap ótti.
Tyńdarman qaýym «Astana keshteri» festıvaliniń qorytyndy konsertine joǵary baǵa berdi. Zaldaǵy kórermenniń ystyq yqylasy men zor qoshemeti soǵan dálel boldy.
«Búgingi erekshe konsert shynymen de óz ataýyna sáıkes boldy. Biz álemdegi úzdik vaksına – mýzykalyq vaksınanyń kóp mólsherin zor yqylaspen qabyldadyq. Ár kompozısııa biz úshin syılyq sııaqty boldy. Osy keshte shyrqalǵan keremet mýzykany biz uzaq ýaqyt jadymyzda saqtaımyz» - syndy pikirler arqyly kórermender óz lebizderin jetkizdi.
Festıvaldiń uıymdastyrýshylary – «Degdar» gýmanıtarlyq qory, Nur-Sultan qalasynyń ákimdigi, JTI kompanııasy. Uıymdastyrýshylardyń baspasóz qyzmeti málimdegendeı, festıval «MuzVac - úzdik mýzykalyq vaksına!» uranyn arqaý etip, Elorda kúnin merekeleý aıasynda ótkizildi. Qaıyrymdylyq joba elordalyq kórermenge 3 konsert usyndy.
Jalpy, «Astana keshteri» óner festıvali Darıǵa Nazarbaevanyń bastamasymen jas Elordamyzǵa degen zor súıispenshiliktiń belgisi retinde dúnıege kelgeni belgili. Bul festıval mýzykalyq ónerdiń san túrli janrlaryn biriktiretin erekshe konsepsııanyń arqasynda elimizdiń mádenı ómirindegi ıgi dástúrge aınaldy.
Festıvaldiń seriktesteri – QR Mádenıet jáne sport mınıstrligi, «Qazaqkonsert» memlekettik konserttik uıymy, «Astana Opera» teatry, «Habar» agenttigi.