Jýyrda Qazaqstan Respýblıkasynyń Tuńǵysh Prezıdenti – Elbasy kitaphanasynda mekeme qoryndaǵy mýzeılik qarý-jaraqtar men áskerı saýyt-saımandar toptamasyn qoıyp, «Táýelsizdiktiń mádenı negizi» jobasy aıasynda «Bir jádigerdiń tarıhy. Batyrlar jáne samýraılar ınstıtýty – mádenıet kórsetkishi» atty kórme uıymdastyrdy.
Eki bólimnen turatyn kórme qazaq batyrlary jáne samýraılardyń áskerı saýyt-saımandary, qarý-jaraqtarymen ǵana emes, sonymen qatar Qazaqstan men Japonııa tarıhy, salt-dástúrleri, ádet-ǵuryptary, ulttyq mádenı hám turmys buıymdarymen tanystyrsa, kúmis zalda samýraılyq úrdis nasıhattalyp, japon óneri men dástúri usynyldy.
Oǵan qosa kórme zalynda «Bes qarý» jaýyngerlik qural-saıman jıyntyǵy, sarbazdyń qorǵanys jaraǵy, sondaı-aq batyrlyq dástúrdiń paıda bolýyna yqpal etken kóshpendi mádenıettiń tarıhy men jetistikteri jaıly baıandaıtyn jádigerler usynylsa, ortaǵasyrlyq jaýyngerler tıpi – batyrlar men samýraılar beınesin bir-birimen tyǵyz baılanystyra kórsetýimen qundy boldy.