Forvardtyq satyp alý tájirıbesi fermerler arasynda úlken suranysqa ıe bolyp, birqatar áleýmettik mańyzy bar azyq-túlik taýarlarynyń baǵasyn turaqtandyrýǵa múmkindik berip otyr, dep habarlaıdy Egemen.kz.
2020 jyldyń qorytyndysy boıynsha forvardtyq satyp alý baǵdarlamasy aýyl sharýashylyǵy óndirýshileri arasynda joǵary suranysqa ıe bolyp, aýyl sharýashylyǵy sýbektilerine kredıt berý tapshylyǵy jaǵdaıynda qarjylandyrýdyń qoljetimdi quraly boldy.
Baǵdarlama boıynsha 2020 jyly 300-den astam aýyl sharýashylyǵy óndirýshileri qarjylandyrylyp, 480 myń tonnadan astam astyq satyp alyndy.
Aǵymdaǵy jyldyń basynan bastap «Azyq-túlik kelisimshart korporasııasy» UK» AQ óziniń ishki naryqty turaqtandyrý boıynsha negizgi fýnksııalaryn oryndaý aıasynda satyp alynǵan kólemder esebinen 410 myń tonnadan astam astyq satqan.
Onyń 325 myń tonnasy un tartý kompanııalaryna satyldy. Osynyń nátıjesinde 2021 jyly nan baǵasynyń kúrt qymbattaýy baıqalmaıdy, unǵa qatysty jáne astyq eksportyn jabý nemese shekteý týraly da suraqtar týyndaǵan joq.
Sondaı-aq Azyq-túlik korporasııasy forvardtyq satyp alý baǵdarlamasy aıasynda alynǵan astyqtan jemshóp qoryn qurdy. Atalmysh qordan mal sharýashylyǵy jáne qus sharýashylyǵy kásiporyndarynyń qajettilikteri úshin 4 synypty 17 myń tonna bıdaı jáne 24 myń tonna arpa satyldy.
Naryqtaǵy baǵanyń maýsymdyq ósýine qaramastan, ákimdikterdiń ótinimderi boıynsha 20-ǵa jýyq mal sharýashylyǵy kásiporyndaryna belgilengen baǵadaǵy jalpy kólemi 23 myń tonnadan astam 4 klasty arpa men bıdaı jetkizildi.
Atap aıtqanda, Azyq-túlik kelisimshart korporasııasy Mańǵystaý oblysyndaǵy jem-shóptiń jetispeýshiligi boıynsha qalyptasqan jaǵdaıǵa baılanysty fermerlik sharýashylyqtardy qoldaý úshin naryqtyq baǵadan 17%-ǵa tómen baǵadaǵy jemdik astyqty jetkizý týraly jedel sharalar qabyldady. Qabyldaýǵa jáne ony odan ári mal sharýashylyqtary arasynda taratýǵa yńǵaıly bolý úshin arpa aldyn-ala 50 kg qapshyqqa bólip salyndy.
Qazirgi ýaqytta Qyzylorda oblysynyń mal sharýashylyǵy kásiporyndaryna da arpa jetkizý jumystary júrgizilip jatyr.
Azyq-túlik korporasııasyna júgingen 15 qus fabrıkasyna 66 myń tonnadan astam astyq satyldy. Astyq satyp alýshylar arasynda jumyrtqa baǵytyndaǵy 9 qus fabrıkasy jáne et baǵytyndaǵy 6 qus fabrıkasy bar.
Mysaly, Ortalyq Azııadaǵy eń iri qus fabrıkasy - «Makınsk qus fabrıkasy» JShS –shıkizattyń negizgi jetkizýshisi retinde Azyq-túlik korporasııasyn tańdady. Kásiporynǵa astyq belgilengen baǵalar boıynsha turaqty túrde jetkizilip otyrady, bul maýsym boıy túpkilikti ónimniń qunyn josparlaýǵa múmkindik beredi.
Dástúrli daqyldardan(bıdaı, arpa) basqa Azyq-túlik kelisim shart korporasııasy 5,3 myń tonna kúnbaǵys jáne 300 tonna qaraqumyq satyp aldy. Korporasııa bul kólemderdi ishki naryqty kúnbaǵys maıy men qaraqumyq jarmasymen qamtamasyz etý úshin qaıta óńdeý kásiporyndaryna ótkizýdi josparlap otyr.
Jazǵy kezeńde qant naryǵyndaǵy qalyptasyp otyrǵan jaǵdaıdy eskere otyryp, Azyq-túlik kelisim shart korporasııasy 10 myń tonna kólemde qant qoryn qalyptastyrdy, olar da ishki naryqqa baǵyttalatyn bolady.
Qolda bar qorlar týraly aqparat oblystardyń jáne respýblıkalyq mańyzy bar qalalardyń ákimdikterine, áleýmettik-kásipkerlik korporasııalarǵa jáne Qazaqstannyń kóterme-bólshek saýda jelilerine únemi jetkizilip otyrady.